MINEDUC: HAJE IMPINDUKA NSHYA MU MITEGURIRE Y'IBIZAMINI

Minisiteri y’uburezi iratangaza ko guhera muri uyu mwaka w’amashuli, uburyo bw’isuzuma-bumenyi ku banyeshuli bwavuguruwe, kuko hagiyeho ibizamini bizajya bitegurwa na minisiteri y’uburezi bigatangwa mu myaka yose y’amashuli abanza n’ayisumbuye. 

Ubu buryo bushya ngo buzafasha kumenya hakiri kare ahari icyuho mu burezi.

Ibizamini mu mashuri abanza n'ayisumbuye mu gihembwe cya mbere bizajya bitangwa ku rwego rw'amashuri abanyeshuri bigaho naho igihembwe cya 2 ibizamini bitegurwe ku rwego rw'akarere, naho ibizamini bisoza igihembwe cya 3 bizajya bitegurwa n'ikigo gishinzwe guteza imbere uburezi mu Rwanda (REB). 

Ni ibizamini bizajya bitangwa mu mashuri yose n’ayisumbuye.

Umunyamanga wa leta ushinzwe amashuri abanza n’ayisumbuye Dr.Isaac Munyakazi asobanura ko ibi bizamini bizajya bitegurwa n’ikigo cy’igihugu gishinzwe uburezi mu Rwanda ariko bitazajya biherekezwa n’abashinzwe umutekano nk’uko bisanzwe mu bizamini bya leta.

Amanota abanyeshuri bazajya babona mu bihembwe uko ari bitatu azajya ateranywa ku mwaka maze abanyeshuri bimuke hashingiwe ku mitsindire yabo muri ibyo bizamini byose.