Kwishyura moto hakoreshejwe kashi mu Mujyi wa Kigali bigiye kuba amateka

Urwego Ngenzuramikorere RURA ndetse na Polisi y’u Rwanda baratangaza ko guhera tariki 15 Kanama 2020 nta muntu n'umwe uzemererwa gutwara umugenzi kuri moto idafite imashini ibara uburebure bw’urugendo izwi nka Mubazi.

Bamwe mu bamotari ariko batangaza ka batishimira uko bazihabwa ndetse ntibanahugurwe ku mikorere yazo,ibi bituma hari abahitamo kutazikoresha.

RURA ivuga ko iyi gahunda imaze igihe itegurwa harimo no gutegurwa abarebwa na yo. Biteganijwe  ko iyi  gahunda izagezwa mu gihugu hose, icyakora ku ikubitiro izatangirira ku batwara abagenzi kuri moto bakorera mu Mujyi wa Kigali.i

Izi mubazi kandi zikazatangirana n’ibiciro bishya aho kuva ku urugendo rutangiye kugeza ku bilometero 2 ari amafaranga 300, nyuma uko urugendo rukomeza umugenzi akazajya yishyura 133 kuri buri kilometero

Ku rundi ruhande ariko bamwe mu bamotari  barebwa n’iyi gahunda, banasanzwe batunze izi mubazi, bagaragaza ibibazo bitandukanye batezwa na zo  harimo no kuba hari abagenzi  bagaragaza ko ibiciro zerekana biri hejuru.

Ubuyobozi bw’Umujyi wa Kigali busaba abagenzi korohereza abamotari kuko kwishyura hakoresheje ikoranabuhanga biri no mu bibafasha kwirinda icyorezo COVID19.

Ishyirwa mu bikorwa ry’iyi gahunda rizakurikiranwa n’Umujyi wa Kigali,RURA ndetse na Polisi.

Umumotari uzajya uhabwa mubazi azajya ayishyura mu gihe cy’imyaka ibiri, ku mafaranga akoreye haveho 10.5 akajya kuri konti y’ikigo cyayimuhaye nk’inyishyu ya mubazi.

Mu Rwanda habarurwa moto zitwara abagenzi ibihumbi 46 kugeza ubu moto ibihumbi 19500 ni zo zikoresha mubazi

Danton GASIGWA