Kwirinda COVID19 byifashe bite mu nkengero za Kigali?

Bamwe mu baturage batuye mu nkengero z’Umujyi wa Kigali baravuga ko igihe cyose bagenzi babo bakomeza gukerensa ingamba zijyanye no kurwanya icyorezo cya Covid19.

Ibi biraterwa nuko hari bamwe bagifite imyumvire yo hasi yo kumva ko icyorezo cya COVID19 ari indwara y'abanyamujyi bakirengagiza amabwiriza yashyizweho yo kukirwanya.

Umurenge wa Shyorongi w'Akarere ka Rulindo  uhana imbibi n'Umujyi wa Kigali, usanga abaturage bagenda mu muhanda bamwe nta gapfukamunwa bambaye  abafatanye, abicaye ku mihanda bakina amakarita ndetse na kandagira ukarabe imbere y'amaduka zitabamo amazi.

Ibi kandi bigaragarira no muri bimwe mu bice by'akarere ka Kamonyi.

Bamwe bavuga ko kutubahiriza aya mabwiriza bumva ko icyorezo cya COVID19 ari indwara y'abanyamujyi, abandi bakanenga imyumvire nk'iyi yo hasi.

Umuvugizi wa polisi y’u Rwanda CP John Bosco Kabera avuga ko batazihanganira umuntu wese urenga ku mabwiriza yo kwirinda icyorezo cya COVID19.

Kubera ubukana bw'icyorezo cya COVID19 ingendo hagati y'uturere n'uturere n'umujyi wa Kigali zirabujijwe. Gusa iyo ugeze mu turere usanga hari abaturage baca mu nzira zitemewe n'amategeko bakajya mu tundi turere tw'intara  ndetse n'Umujyi wa Kigali.

Jean Paul TURATSINZE