Kwibohora27: Ubuhamya bw'uburyo abanyarwanda bishimira umutekano igihugu kimaze kugeraho

AGEZWEHO

  • Bamwe mu bize amasomo y’uburezi budaheza bavuga ko babuze icyo bakora – Soma inkuru...
  • Ibarura2022: NISR yasoje igikorwa cyo gushyira nimero ku nzu – Soma inkuru...

Kwibohora27: Ubuhamya bw'uburyo abanyarwanda bishimira umutekano igihugu kimaze kugeraho

Yanditswe Jul, 04 2021 09:12 AM | 26,754 Views



Ababaye mu Rwanda mbere ya 1994 bahamya ko kugira umutekano usesuye bitashobokaga kuko hari n'ubwo inzego zitwaga ko ziwushinzwe ari zo ahubwo zahohoteraga abaturage kandi ntihagire ubiryozwa. 

Kuri uyu munsi u Rwanda rwizihiza imyaka 27 ishize rwiboboye, bakaba bishimira ko umutekano ari ihame igihugu gikomeyeho.

Kimwe n'ibindi bihugu, u Rwanda ruhabwa ubwigenge mu 1962 rwagize ingabo ubusanzwe zifite inshingano zirimo kubungabunga umutekano n'ubusugire bw'igihugu muri rusange. 

Maitre Laurent Nkongoli wakoze umurimo w'ubujyanama mu mategeko kuva mu 1984, avuga ko mu Rwanda ariko atari uko byagenze.

Yagize ati “Kuva kuri Kayibanda na Habyarimana, mu by'ukuri mu gisirikare nta mbaraga nyinshi izo arizo zose zo kurinda igihugu n'abaturarwanda zari zihari, ahubwo zari izo kurinda uduce tumwe na tumwe tw'Abanyarwanda, akandi kazi kanini kakaba ako kubuza amahoro no kwica abo bitaga ko ari abanzi babo ni ukuvuga abatutsi ndetse hakaza n'abatuye ibice bimwe na bimwe by'igihugu.

"Hari ahantu tutashoboraga gukandagira, hariya hitwa Camp Kigali ntiwashoboraga kuhaca, Kimihurura ntitwashoboraga kuhaca twahoraga duhindura amayira.”

Uko guhabwa icyerekezo kibi ku ngabo ngo byageraga no ku baturage basanzwe bahohoterwaga ntawe ubarengera. 

Mutabazi Godefroid atuye Kimihurura kuva 1986 yagize ati “Nk'aba GP b'icyo gihe barazaga ukaba wanakubitwa ugahaguruka ukagenda, abitwaga ngo ni abayobozi bakabura icyo bakorera abo bantu, abashinzwe umutekano ni bo wasangaga bahohotera abantu.”

Rwagasana James we ati “Hari urwego rwayoborwaga na Lizinde ariko byari agahomamunwa wasangaga bakubita abaturage, ugasanga baraje bagutwaye umugore ku ngufu ntaho ushobora kurega abayobozi bose babireba, wasanga ari abantu batagira amategeko abagenga.”

Maitre Laurent Nkongoli yongeraho ko akarengane kakomezwaga ahanini n'uko hari abantu basaga n'abari hejuru y'amategeko.

Ati “Hari abari indakoreka bavugaga ngo uwo ndi we? Bivuze ngo nta kintu wankoraho njyewe ndi uwa aha n'aha kandi ndakomeye." 

Mu gihe guhoza umuturage ku nkeke no kumuhohotera atagira kirengera byari byarabaye nk'umuco mbere ya 1994, ubu abaturage bishimira ko kuva u Rwanda rubohowe guhera mu myaka 27 ishize, hubatswe umusingi utajegajega wo gusigasira umutekano w'abarutuye.

Mutabazi Godefroid yagize ati “Ukabona nk'umuntu bamwibye kandi abamwibye bagiye ariko wajya kubona ukabona bya bintu biragarutse, iryo rero ni itandukaniro kera ntago byabagaho, iyo bakwibaga byabaga birangiye. N'uwahohoteye umuntu ubu baramushaka  bakamubona nta hantu yacikira.”

Perezida Paul Kagame yakunze kubigarukaho kenshi ko umutekano n’ubusugire bw’igihugu, ari ihame nta kuka ubuyobozi bukomeyeho.

Umutekano n'ubuyobozi bugendera ku mategeko bigaragazwa nk'umusingi, uzatuma u Rwanda rukomeza gutera imbere mu nzego zose.

Jean Damascene MANISHIMWE



Ba uwambere gutanga igitekerezo

Tanga igitekerezo:



RSS FEED

Mu kigo ndangamuco cy'u Bufaransa hagiye kuzajya habera imihango yo kwibuka

Perezida Kagame yashimiye abifurije u Rwanda isabukuru nziza yo kwibohora

Uko ibikorwaremezo byafashije abatuye Nyagatare kutajya gushaka serivisi mu bihu

Kwibohora 27: Uko ubuhinzi bwateye imbere mu buryo budasanzwe mu myaka 27 ishize

Mu mafoto: Imiterere y'Umudugudu w’icyitegererezo wa Kinigi watujwemo

Kwibohora27: Iterambere ry’inganda umusingi uhamye wo kwibohora