AGEZWEHO

  • Imihindagurikire y’ikirere ni imbogamizi ku iterambere ry’Umugabane wa Afurika - Perezida Kagame – Soma inkuru...
  • Perezida Kagame yashimangiye ko Qatar yari ikwiriye kwakira Igikombe cy'Isi – Soma inkuru...

Kigali: Hashyinguwe mu cyubahiro imibiri 9000 y'abatutsi bishwe muri Jenoside

Yanditswe May, 26 2022 21:14 PM | 100,007 Views



Minisitiri w'Ubumwe bw'Abanyarwanda n'Inshingano Mboneragihugu Dr Bizimana Jean Damascène arasaba abarokotse jenoside yakorewe abatutsi muri rusange kudaha umwanya abinangiye gutanga amakuru y'ahajugunywe imibiri y'abazize jenoside yakorewe abatutsi mu 1994 kuko biha urwaho abakomeza gupfobya jenoside.

Ibi Minisitiri Bizimana yabigarutseho ubwo mu Mujyi wa Kigali hashyingurwaga imibiri isaga ibihumbi 9 yabonetse mu turere tugize uyu mugi. 

Ubuhamya butangwa na bamwe mu barokotse jenoside mu Mujyi wa Kigali barimo Florence Mukantaganda wari utuye i Kabuga mu Karere ka Kicukiro,  bugaruka ku kuba mu Mujyi wa Kigali no mu nkengero zawo iyicwa ry'abatutsi ryaratangiye no mu myaka ya mbere ya jenoside nyirizina.

Uyu mukecuru wiciwe umugabo we ndetse n'umuryango wose avukamo avuga ko yishimira kuba yararokotse bigizwemo uruhare n'ingabo z'Inkotanyi ariko nanone agashengurwa no kuba hari imiryango igera kuri 59 yiciwe muri aka gace ariko kugeza ubu bakaba nta makuru bafite arebana n'aho bajugunywe ngo bashyingurwe mu cyubahiro nyamara hari abafite amakuru.

Ahitwa Gahoromani mu murenge wa Masaka ni hamwe mu habonywe imibiri igera ku bihumbi 9 y'abatutsi bishwe muri jenoside, na ho mu mirenge ya Nyarugenge, Gitega na Mageragere haboneka imibiri 181.

Aha ni ho Komiseri mu muryango uharanira inyungu z'abarokotse (Ibuka) Rugero Paulin ahera ashimangira ko kuba hari amakuru ataramenyekana y'ahajugunywe imibiri y'abishwe muri jenoside nyamara hashize imyaka 28 ihagaritswe, ngo bigaragaza urwego ipfobya n'ihakana rya jenoside ririho.

Iyi mibiri ibihumbi 9181, yabonetse mu bihe binyuranye mu bice by'Umujyi wa Kigali yashyinguwe mu cyubahiro mu Rwibutso rwa Nyanza ya Kicukiro. Ubuyobozi bw'Umujyi wa Kigali bushimangira ko ibikorwa byo gushakisha imibiri y'abazize jonoside  bizakomeza kugira ngo ishyingurwe mu cyubahiro no guha agaciro abazize jenoside.

Minisitiri w'Ubumwe bw'Abanyarwanda n'Inshingano Mboneragihugu Dr Bizimana Jean Damascène yihanganishije ababuze ababo muri jenoside yakorewe abatutsi mu 1994 by'umwihariko mu Mujyi wa Kigali ariko anasaba muri rusange kudaheranwa n'agahinda no kudakomeza kwita cyane ku batifuza gutanga amakuru y'ahajugunywe  imibiri y'abatutsi bishwe muri jenoside.

Yavuze ko abantu mu nzego zose bagize uruhare muri jenoside barimo n'abaganga aho habarurwa abadogiteri 68 bahamwe n'ibyaha bya jenoside barimo 26 b'iyahoze ari perefegitura ya Butare, na ho abaforomo 89 na bo bakaba barahamwe n'iki cyaha kidasaza.

Guverinoma y''u Rwanda ivuga ko izakomeza gukurikirana uwo ari we wese wagize iruhare muri jenoside yakorewe abatutsi mu 1994 aho ari hose.


Jean Claude MUTUYEYEZU



Ba uwambere gutanga igitekerezo

Tanga igitekerezo:



RSS FEED

Gisagara: Barifuza ko abakoze Jenoside bafungurwa bahabwa inyigisho z'ubumw

Gufata ku ngufu abagore intwaro yakoreshejwe n'abicanyi muri Jenoside

Kwibuka28: Ku myaka 12 gusa, Nimukuze yarokoye uruhinja rw'amezi 5