Kayonza: Hafungiye abayobozi bakekwaho kurya ibya rubanda rugufi

Kuri station ya police ya Rukara mu Karere ka Kayonza hafungiye abayobozi babiri b’akagari bakekwaho kunyereza ibya rubanda bigizwe n’ibihumbi 165 by’amafaranga y’u Rwanda y’umusanzu w’ubwisungane mu kwivuza, watanzwe n’abaturage, toni n’igice y’ifumbire yo mu bwoko bwa Urea na NPK, n’ibiro 500 by’ibigori byari bigenewe guhabwa abaturage.

Abakurikiranyweho iki cyaha, ni Umunyamabanga nshingwabikorwa w’akagari kamwe ko mu murenge wa Rukara n’undi muyobozi ushinzwe imibereho myiza y’abaturage muri ako kagari.

Umuvugizi wa Polisi y’u Rwanda mu ntara y’iburasirazuba, IP Emmanuel Kayigi asobanura ko mu kwezi kwa cumi k’umwaka ushize, aba bombi ngo bakanguriye abaturage bari batinze gutanga amafaranga y’ubwisungane mu kwivuza, barayatanga noneho bombi babasezeranya ko bazayabagereza ku kigo nderabuzima cya Rukara.