Ingabo z’u Rwanda 162 zo mu ishami ry’iby’indege zerekeje muri Sudani y’Epfo mu butumwa bw’amahoro

Ingabo z’u Rwanda zatangiye gusimbuza abasirikare bo mu ishami ryayo ry’iby’indege zari mu butumwa bw'umuryango w'abibumbye bwo kubungabunga amahoro muri Sudani y’Epfo (UNMISS).

Iri tsinda ry’ingabo rigizwe n’abagera ku 162 barimo abapilote, abenjeniyeri mu by’indege n’abakozi bazasimbura bagenzi babo basoje inshingano bari bahawe muri UNMISS.

Icyiciro cya mbere cy’aboherejwe muri Sudani y’Epfo cyahagurutse i Kigali cyerekeza mu wa Juba kuri uyu wa Gatanu ndetse bagenzi babo bariyo nabo bagarutse.

Col Louis Kanobayire yabasabye kurangwa n’ikinyabupfura, gukorera hamwe kandi bagasigasira isura nziza y’u Rwanda bashyira mu bikorwa neza inshingano zibajyanye.

Inshingano z’ingenzi zahawe ingabo zo mu ishami ry’iby’indege zirimo kugenzura umutekano wo mu kirere, gutanga ubutabazi n’ubufasha mu buvuzi, gutwara ingabo mu gihe ziri gusimburana, gutwara abakozi b’umuryango w’abibumbye n’imitwaro yabo ndetse n’ibindi.

Ingabo z’u Rwanda zifite batayo eshatu, muri zo ishami ry’iby’indege rifite kajugujugu esheshatu zitanga ubufasha mu butumwa bwa UNMISS muri Sudani y’Epfo.

Mu bihugu bitanga ingabo nyinshi mu bikorwa bya Loni byo kugarura amahoro, u Rwanda ruri ku mwanya wa gatatu.