Imyitozo ya ‘Ushirikiano Imara’ ihuza Ingabo zigize ibihugu bya EAC yatangiye muri Uganda

Kuri uyu wa Gatanu, ingabo zo mu bihugu bigize Umuryango wa EAC, abapolisi n’abasivili baturutse mu bihugu 6 aribyo u Rwanda, u Burundi, Kenya, Sudani yepfo, Tanzaniya na Uganda batangiye imyitozo ya gisirikare ku nshuro ya 12 yiswe “Ushirikiano Imara” 2022 ibera muri Uganda.

Iyi myitozo izamara ibyumweru bibiri izakorwa ku nsanganyamatsiko igira iti: "Guteza imbere amahoro, umutekano n’ituze biganisha ku gushyira hamwe kw’Umuryango w’ibihugu bya Afurika y'Iburasirazuba."

Ubwo yatangizaga iyi myitozo, Minisitiri w’Intebe wa gatatu wa Uganda, Rukia Nakadama yavuze ko iyi myitozo iha ibihugu by’abafatanyabikorwa ba EAC amahirwe yo kongera imikoranire hagati y’ingabo no gushimangira gahunda y’ubufatanye bwa Afurika y’Iburasirazuba.

Muri uyu muhango u Rwanda rwari ruhagarariwe n’Umugaba w'Ingabo zirwanira ku Butaka, Lt Gen Mubarakh Muganga.