Impunzi 66 zituruka muri Libya ni zo zigera mu Rwanda kuri uyu wa Kane

Minisiteri Ishinzwe Ibikorwa by'Ubutabazi (MINEMA), itangaza ko n'ubwo hataramenyekana neza isaha izo mpunzi zigerera i Kigali, ngo nizihagera zirahita zijyanwa i Gashora muri iyo nkambi kuko imyiteguro yose yarangiye.

Indege itwaye izo mpunzi yahagurutse mu masaha ya saa kumi n'imwe zishyira saa kumi n'ebyiri, aho biteganyijwe ko ishobora kugera ku Kibuga Mpuzamahanga cya Kigali mu masaha ya saa tatu n'igice z'ijoro.

Izi mpunzi ni icyiciro cya mbere cy’impunzi 500 u Rwanda rwiyemeje kwakira ziva muri muri Libya, aho zikomeje gukorerwa ibikorwa bya kinyamanswa.

Muri uku kwezi Guverinoma y’u Rwanda yasinyanye amasezerano n'umuryango wa Afurika yunze Ubumwe n’Ishami ry’Umuryango w’Abibumbye ryita ku mpunzi, HCR, agamije kwakira impunzi z’abanyafurika 500 zaheze muri Libya aho zibayeho nabi.

Perezida wa Repubulika Paul Kagame, ubwo yagezaga ijambo ku bitabiriye Inteko Rusange y'Umuryango w'Abibumbye yavuze, ko kuba u Rwanda rwaremeye kwakira impunzi n'abimukira bo mu gihugu cya Libya ari ikimenyetso cyerekana ko Afurika yifitemo ibisubizo ku bibazo byayo ndetse ubufatanye n'Isi muri rusange bushobora gutanga ibisubizo ku bibazo by'ingutu byugarije Isi muri iki gihe.

Yagaragaje ko ubufatanye no kutikanyiza kwa bamwe, byatanga umuti urambye ku bibazo byugarije Isi birimo n'icy'abimukira cyabaye agatereranzamba, aho bamwe muri bo bakomeje kurohama mu mazi magari abandi bagacuruzwa.

Izi mpunzi nizigera i Gashora ngo ibikorwa nyir'izina byo kubitaho nko kubagaburira,kubasuzuma,kubavura no kubaha aho barara birakomeza kugira ngo bashire impumu kuko ngo bari basanzwe mu buzima butari bwiza.

                        Imwe mu nzu zizakira impunzi mu Nkambi y'Agateganyo ya Gashora