Impinduka za hato na hato, kimwe mu byazonze ireme ry'uburezi

Bamwe mu bafite aho bahuriye n'uburezi baravuga ko amavugururwa ya hato na hato akorwa mu rwego rw'uburezi ari kimwe mu bituma ireme ryabwo rigenda rigabanuka. 

Abasesenguzi bo basanga hakwiye kubaho ibiganiro byo ku rwego rwo hejuru bigamije gushakira umuti ibibazo biri mu burezi.

N'ubwo umubare w'ibyumba by'amashuri urushaho kugenda wiyongera buri mwaka kimwe n'abana bagana aya mashuri, abakora umurimo wo kwigisha bavuga ko hamwe na hamwe abanyeshuri baba ari benshi mu byumba bikagorana kubakurikirana mu myigire yabo.

Amwe mu mavugurura cg impinduka zikunze kubaho mu rwego rw'uburezi, abarimu bavuga ko na zo ziri mu bidindiza ireme ry'uburezi bityo ngo inzego zibishinzwe zikwiye kujya zireka gahunda yashyizweho ikamara igihe kugira ngo harebwe niba itanga umusaruro.

Bamwe mu babyeyi bavuga ko ireme ry'uburezi rinabangamirwa n'ubushobozi buke bw'imiryango imwe n'imwe mu birebana no guha abana ibyo bakeneye, iri mu bituma biga nabi abandi bagata, amashuri ibintu binagira ingaruka ku mibereho yabo mu gihe kizaza.

Imibare y'ibipimo by'imiyoborere y'uyu mwaka igaragaza ko ireme ry'uburezi riri ku gipimo cya 53.6%. Umukuru w'Urwego rw'Igihugu rw'Imiyoborere, RGB, Dr Usta Kaitesi ahamya ko hagomba kubaho ubufatanye bw'inzego zose bireba kugira ngo ireme ry'uburezi rizamuke.

Abasesengura iby'iterambere ry'igihugu rifatiye ku burezi basanga hakwiye kubaho ibiganiro byo ku rwego rwo hejuru bihuje inzego zinyuranye kugira ngo zigire hamwe uko ibibazo byo mu rwego rw'uburezi byakemuka.

Usibye ireme ry'uburezi riri ku gipimo cyo hasi, ibijyanye no kugaburira abana ku mashuri na byo biri kugipimo cya 44.3%, guta amashuri ku gipimo cya 33.5%; ibi byose bikaba bifite ingaruka zikomeye mu mikurire y'abana, ibintu bisaba inzego bireba gushyira imbaraga mu gutanga uburezi bufite ireme kuko ari wo musingi w'iterambere rusange ry'umuturage.

Jean Claude Mutuyeyezu