Imiryango 560 muri Muhanga yemerewe uburenganzira bwandikwa mu bitabo by’irangamimerere

Imiryango 560 muri Muhanga yemerewe guhabwa uburenganzira bwo kwandikwa mu bitabo by’irangamimerere

Imiryango 560 kuri 866 yo mu Mirenge ya Mushishiro na Muhanga, yemerewe n’urukiko rw’ibanze rwa Nyamabuye mu karere ka Muhanga kongera guhabwa uburenganzira bwo kwandikwa mu bitabo by’irangamimerere.

Ibi bikozwe nyuma y’aho mu myaka ya 1997 na 1998 dosiye zose z’iyahoze ari komine Buringa zatwitswe n’abacengezi, bituma nta muntu n’umwe wongera kubona icyangombwa cy’uko yashyingiwe, kuko nta kimenyetso na kimwe cyabigaragazaga.

Ubu akanyamuneza ni kose ku basanganywe iki kibazo, ndetse abagera ku 123 bakaba bamaze kongera kwandikwa mu Murenge wa Mushishiro.

Itegeko rigenga umuryango n’abantu ryo mu 2016, riteganya ko iyo hari impamvu yatumye ibitabo by’irangamimerere bizimira hakorwa iperereza, rizavamo ikirego gitangwa n’abahagarariye inyungu z’abaturage hagafatwa umwanzuro ku kirego cyatanzwe.

Akarere ka Muhanga niko kareze mu izina ry’abaturage aho 64.6% ari bo bamaze kwemererwa gusubizwa mu bitabo by’irangamimerere, abandi bakazafashwa mu mwaka w’ingengo y’imari 2021/2022.