Imiryango 12 yatujwe mu Mudugudu wa Kazuba muri Ngororero yasabwe kuwufata neza

Abatujwe mu Mudugudu w’icyitegererezo wa Kazuba uherereye mu Murenge wa Muhanda mu karere ka Ngororero, barahiga gushikama bakiteza imbere, ubuyobozi bwo bukaba bubasaba gufata neza inzu bahawe bazitaho bakarushaho kwiteza imbere.

Aba baturage bavuga ko bakize ibibazo baterwaga no kutagira aho kuba, kuko bari batuye ahashyira ubuzima bwabo mu kaga.

Uyu Mudugudu wa Kazuba watujwemo imiryango 12, ikaba irimo abatashye bavuye mu mashyamba ya Repuburika Iharanira Demokarisi ya Kongo, abo mu cyiciro cy’Abanyarwanda amateka agaragaza ko basigaye inyuma n’abandi.

Umuyobozi w’akarere ka Ngororero, Ndayambaje Godefroid, asaba aba baturage gufata neza ibikorwaremezo bahawe, bagafatiraho biteza imbere mu bizima bwabo bwa buri munsi.

Akarere ka Ngororero kamaze kubakwamo Imidugudu itanu y’icyitegererezo, intego ari ugufasha abadafite aho kuba n’abatuye ahashyira ubuzima bwabo mu kaga kubona amacumbi ajyanye n’igihe. 

Ikindi ngo ni ukwereka abaturage uburyo bw’imyubakire igezweho, cyane nk’akarere k’imisozi miremire gakunze kwibasirwa n’ibiza.

Aka karere kavuga ko kugeza ubu kamaze gutera ahantu 100 ho gutura, hadashyira abaturage mu kaga.