Igihe kirageze ngo dukorane imbaraga kugirango inzozi zacu zibe impamo-KAGAME

Perezida wa Repubulika Paul Kagame,  ari  i Nairobi muri Kenya aho yitabiriye ihuriro ku mpinduramatwara mu by'ubuhinzi butangiza ibidukikije muri Afrika, Africa Green Revolution Forum .

Mu kiganiro Perezida Kagame amaze gutanga ari kumwe na Perezida wa Kenya Uhuru Kenyatta, Perezida Kagame yavuze ko ibyo u Rwanda rwagerageje mu guteza imbere ubuhinzi harimo gukoresha neza ubutaka ndetse hakanakoreshwa ikoranabuhanga bigaragazako hari byinshi byashoboka mu guteza imbere ubuhinzi n'ahandi muri Africa.

Perezida Kagame uvuga ko hakwiye gushakwa uburyo haba impinduka mu buhinzi ndetse no mu bukungu bw'umugabane w'Afrika ngo kuko ubuhinzi  atari urwego rumwe  gusa rw'ubukungu mu zindi nzego, ahubwo ari inkingi ya mwamba y'ubukungu.

Perezida Kagame yavuze kandi ko abanyafurika bakwiye guhindura uburyo bwo gutekereza ku buhinzi bwo kubona ibyo kurya gusa, ahubwo bakarenga kuri urwo rwego bakarugeza ku rwego rwo gusagurira amasoko.

Avuga ko hakwiye ko n'urubyiruko rubigiramo uruhare kugirango iterambere ry'ubuhinzi rizarambe kandi n'abagore badasigaye inyuma. Ibi kandi ngo bigakorwa hashingiwe ku byihutirwa kurusha ibindi kandi biboneka mu bihugu by'Afrika ku bufatanye n'abikorera.