"Ibyo byose ndegwa ntacyo nshaka kubivugaho" Ladislas NTAGANZWA

Kuri uyu wa 1 Ladislas Ntaganzwa nibwo yitabye urukiko rw'ibanze rwa Nyarugunga, kugira ngo atangire kuburana ku byaha akekwaho birebana na jenoside. Uyu mugabo aherutse koherezwa na Leta ya Kongo Kinshasa ngo aburanishwe n'u Rwanda nyuma yo gutabwa muri yombi kuko yashakishwaga n'ubutabera mpuzamahanga.

Ahagana saa yine n'igice nibwo yageze ku rukiko rw'ibanze rwa Nyarugunga aho yitabye ari kumwe n'umwunganizi we mu by'amategeko.

Ntaganzwa Ladislas yasomewe ibyaha akurikiranyweho ari byo icyaha cya jenoside, gushishikariza abandi gukora jenoside, ubwicanyi, kurimbura imbaga no gusambanya ku gahato. Ibyaha yakoze mu mwaka w'1994 ubwo yari burugumestiri wa komini Nyakizu mu cyahoze ari Perefegitura ya Butare.

Muri ibi byaha byose aregwa yavuze ko yifashe. Mu nteruro imwe gusa yagize ati: "ibyo byose ndegwa ntacyo nshaka kubivugaho". Ladislas Ntaganzwa waburanaga ifungwa n'ifungurwa ry'agateganyo ubushinjacyaha bwasabye ko yafungwa iminsi 30. Urukiko rwavuze ko ruzatangaza umwanzuro kuri ubu busabe ku itariki 06 z'uku kwezi kwa 4.