IMIHIGO: Perezida KAGAME yasabye abayobozi kuvugurura imikorere

Mu muhango wo gusinya imihigo y'umwaka wa 2020/2021 Perezida wa Repubulika Paul KAGAME akaba yasabye abayobozi mu nzego zose kuvugurura imikorere bakirinda imico imwe n'imwe ibabuza kwesa imihigo uko bikwiye kuko nta rwitwazo na rumwe bafite mu gihe batageze ku ntego bihaye.

Akarere ka Nyaruguru niko kaje ku isonga mu kwesa imihigo ya 2019/2020 n'amanota 84%, Huye ku mwanya wa 2 n'amanota 82.8% yarushije 0.4% Rwamagana yaje ku mwanya wa 3.

Uturere 3 twa nyuma twose ni utwo mu ntara y'Iburengerazuba ari two Nyabihu ya 28, Karongi ya 29 na Rusizi ya 30 ifite amanota 50%. 

Imihigo y'umwaka wa 2020/2021 isinywe nyuma y'uko Perezida Paul KAGAME asabye ko uburyo yakorwagamo buvugururwa hakibandwa ku mihigo isubiza ibibazo bibangamiye imibereho myiza n'umudendezo w'abaturage. 

Minisitiri w'intebe Dr. Edouard NGIRENTE akaba avuga ko ibyo bizakomeza kwitabwaho no mu gihe cyo gusuzuma uko imihigo yashyizwe mu bikorwa.

Umuhango wo gusinya imihigo y'uyu mwaka w'ingengo y'imari ubaye mu gihe u Rwanda ruhanganye n'icyorezo cya COVID19 n'ingaruka zacyo ku bukungu n'imibereho myiza y'abaturage, aho biteganyijwe ko muri uyu mwaka ubukungu bw'u Rwanda buzasubira inyuma ku gipimo cya 0.2% munsi ya zero. Ni nayo mpamvu imihigo yasinywe izibanda ku gusubiza ibintu mu buryo hibandwa ku nzego zahungabanye kurusha izindi. 

Gusinya imihigo hagati y'umukuru w'igihugu n'abayobozi mu nzego zinyuranye byakozwe hifashijwe ikoranabuhanga binyuze muri porogaramu ya mudasobwa yiswe E-Imihigo.