IBITARO BYA FAISAL BIRAHUMURIZA ABARWAYI NYUMA Y'INKONGI YAHAGARAGAYE

Ubuyobozi bw'ibitaro byitiriwe umwami Faisal burahumuriza abanyarwanda ko ikibatsi cy'inkongi y'umuriro w'amashanyarazi cyibasiye cyimwe mu byumba by' ibi bitaro nta murwayi byagizeho ingaruka ndetse serivise zikaba zikomeje gutangwa nk'ibisanzwe.

Iyi nkongi yabaye mu masaha ya saa kumi nimwe na saa kumi n'ebyiri zo kuri uyu wa gatandatu nibwo ikibatsi cy'inkongi y'umuriro w'amashanyarazi cyibasiye imwe kimwe mu byumba  by'ibitaro byitiriwe umwami Faisal, igice kirimo insinga z'amashanyarazi cyohereza umuriro mu maservisi yose y'ibi bitaro bituma habaho impinduka ku mitangire ya serivisi.

Ubwo Iki kibatsi cy'inkongi cy'umuriro w'amashanyarazi cyagaragazaga umwotsi hejuru muri ibi bitaro  harimo abarwayi 113, barimo 22 b'indembe n'abana baba bavutse badashyitse. 

Bikiba abarwayi bari bakenewe ubuvuzi bwihuse bari 8 bahise boherezwa kuvurirwa ku bitaro bikuru bya KAMINUZA bya Kigali, ibitaro bya Gisirikare bya Kanombe, ibitaro bya KACYIRU.

Gusa nyuma y'amasaha 3 iki kibazo cyibaye, hakorwa ibishoboka byose ngo gikemuke, hakorwa n'ubutabazi bw'abaganga bita ku barwayi kugira ngo hatagira uwabura ubuzima kubera iki kibazo, serivisi zongeye gutangwa uko bisanzwe.

Kuri ubu imitangire ya serivise z'ubuvuzi muri ibi bitaro bya FAISAL irakomeje.

Bamwe mu barwaza barimo iki kibazo cyivuka ntibashatse kugira icyo bavuga. Gusa  abaturiye ibi bitaro bavuga ko n'ubwo serivise zongeye gutangwa  hakwiye ubushishozi ku bikorwa remezo by'ibi bitaro bimaze igihe kinini.

Kugeza ubu icyateye iki kibatsi cy'inkongi y'umuriro w'amashanyarazi ntikiramenyakana haracyakorwa iperereza.