I Kigali hakozwe umuganda wo gutoragura imyanda

Kuri uyu wa Gatandatu, abayobozi n'abaturage mu bice bitandukanye by'Umujyi wa Kigali, bazindukiye mu bikorwa byo kunoza isuku, byibanze ku gutoragura imyanda ibangamiye abantu n'ibidukikije muri uyu mujyi.

Ni ibikorwa byitabiriwe kandi na bamwe mu bakozi b’ikigo cy’igihugu gishinzwe kurengera ibidukikije REMA  na Minisiteri y'Ibidukikije. Bamwe mu bitabiriye ibi bikorwa by’umwihariko urubyiruko,bavuga ko kubyitabira ari ishema kuri bo.

Ubuyobozi bw’Umujyi wa Kigali buvuga ko n’ubwo ibikorwa by’umuganda bitarakomorerwa, bashyizeho uburyo bwihariye  bwo gukora isuku bakoresheje abantu bake, kugira ngo umujyi ukomeze gusa neza.

Umunyamabanga uhoraho muri Minisiteri y'ibidukikije Patrick Karera avuga ko bigaragara ko umuganda uhuza abaturage ukenewe, ariko kuwusubukura bizaturuka ku cyemezo kizashingira ku isesengura rya Minisiteri y’Ubuzima.

 Jean Paul MANIRAHO