246 bahoze muri FDLR basoje amasomo y'imyuga n'ubumenyingiro mu karere ka Huye

Mu ishuri rikuru ryigisha imyuga n'ubumenyingiro mu karere ka Huye, habereye gusubiza mu buzima busanzwe bamwe mu bahoze mu mitwe yitwaje intwaro bari bamaze amezi 6 bahabwa amasomo anyuranye y'imyuga n'ubumenyingiro muri TVTs zitandukanye.

Ni umuhango witabiriwe n'Umunyamabanga wa leta muri Minisiteri y'Ubutegetsi bw'igihugu,Nyirarukundo Ignatienne.

Aba barangije  uko ari 246 inyigisho bahawe zirimo gusudira, kudoda n'ibindi bavuga ko bakigera mu Rwanda basanze barasigaye inyuma mu iterambere, bakavuga ko aya masomo babonye agiye kubafasha gukora cyane ngo bashyikire abandi ba Nyarwanda mu iterambere, kuko  bagiye no guhabwa ibikoresho by'ibanze bijyanye n'icyo buri wese yize.

Mbarushimana Moise umwe mu bahoze mu za FDLR, avuga ko imyaka yari amaze my mashyamba ntacyo yungutse uretse gusubira inyuma mu iterambere, akavuga ko bahoraga babwirwa amakuru y'ibihuha ko mu Rwanda nta mahoro ahari.

We na bagenzi be bemeza ko bagiye kurushaho kwiteza imbere, bakangurira bagenzi babo bakiri mu mashyamba gutahuka bakaza gufatanya n'abandi kubaka igihugu cyababyaye.