Hatangijwe isiganwa ry'imodoka rya Rwanda Mountain Gorilla Rally

Kuri uyu wa Gatanu hatangiye isiganwa ry’imodoka ryiswe Rwanda Mountain Gorilla Rally, aho ririmo kuba ku nshuro yaryo ya 21 ndetse no ku nshuro ya 15 kuva rigiye ku marushanwa ya Afurika.

Agace ka mbere kabanziriza utundi ariko kitwa, super stage katangiye kuri uyu wa Gatanu gakinirwa mu muhanda uri hagati ya Kigali Height, KBC na Kigali Convention Center, aho ari agace kaba kari butange uko abasiganwa bazahaguruka bakurikiranye ku gace ka kabiri.

Imodoka zitabiriye iri siganwa ry’uyu mwaka ni 25 zirimo 7 z’Abanyarwanda hakabamo n’imodoka 7 zirimo guhatanira amanota yo ku mugabane wa Afurika.

Kuri uyu wa Gatandatu guhera ku isaha ya saa mbili za mu gitondo kugeza saa kumi z'umugoroba, abasiganwa bazaba bazeguruka mu duce twa Gako-Gasenyi-Nemba-Ruhuha uduce duherereye mu Karere ka Bugesera.

Rwanda Mountain Gorilla Rally ya 2022 yari yegukanywe n’Umunya-Kenya, Karan Patel afatanyije na Tauseef Khan.