Hari abaturage bavuze ko bataryama mu nzitiramibu kubera kuzibura

Hirya no hino mu gihugu hari abaturage bavuga ko bataryama mu nzitiramibu bitewe no kuzibura, ni mu gihe ubushakashatsi bwa 6 ku buzima n'imibereho bwerekana ko ingo zifite inzitiramibu ziteye umuti zavuye kuri 84% muri 2014 / 2015, zigera kuri 66% muri 2019 / 2020.

Mu turere twa Rulindo na Gicumbi mu Ntara y'Amajyarugu, ni hamwe mu ho abaturage bemeza ko inzitiramibu zabo zashaje cyane ku buryo imibu yinjiramo, ndetse hakaba na bamwe mu bagize imiryango yabo batabazifite namba.

Kaneza Josephine, umuforomo mu kigo nderabuzima cya Nyacyonga avuga ko nubwo inzitiramubu zisaza hari igihe zisimburwa nyuma yo gukorerwa raporo.

Ubushakashatsi bwa 6 ku buzima n'imibereho bwa 2019 / 2020 bwerekana ko ingo zifite inzitiramibu ziteye umuti zavuye kuri 84% muri 2014/2015 zigera kuri 66% muri 2019/2020.

Ubwo bushakashatsi bwerekana ko hari 34% by'ingo zidatunze inzitiramibu.

Ubwo ubu bushakashatsi bwamurikagwa, Minisitiri w'Ubuzima Dr. Daniel Ngamije yavuze ko iyi mibare igiye gufasha abafata ibyemezo.

Kuri 66% by'ingo zizifite, ingo zo mu Mijyi zifite inzitiramibu ni 76% mu gihe ingo zo mu cyaro zizifite ari 64% by'uwo mubare.

Umujyi wa Kigali niwo uza ku isonga na 86% by'abafite inzitiramibu, naho Intara y'Iburasirazuba ikaza ku mwanya wa nyuma na 59% by'ingo zirara mu nzitiramibu. 

Bosco Kwizera