Guverineri Habitegeko yagereranyije imihigo ya Rusizi nko kwiyorohereza akazi

Guverineri w’Intara y’Iburengerazuba Habitegeko Francois, kuri uyu wa Mbere, yasabye ubuyobozi bw’Akarere ka Rusizi kuvugurura no kunoza uburyo bateguramo imihigo.

Ni nyuma yo kumurikirwa imihigo y’aka karere y’umwaka wa 2021/2022 akabona ko bahize bike cyane bisa no kwiyorohereza kandi ibibazo by’abaturage bikiri byinshi.

Mu nama nyunguranabitekerezo igamije kunoza itegurwa ry’imihigo y’akarere ka Rusizi,akarere keretse umuyobozi w’intara ibyo gateganya gukora mu mihigo ariko  asanga barihaye  intego ntoya kandi bagomba guhiga imihigo ikemura ibibazo byugarije abaturage.

Guverineri  Habitegeko yahise asaba Akarere ka Rusizi gukosora bimwe mu byuho biri mu mihigo y’aka karere no kongera kuri gahunda imihigo yingenzi batari bashyize kuri gahunda.

Bimwe mu byo yaciyeho akarongo bigomba kugaragara muri iyi mihigo kandi byarirengagijwe muri uyu mwaka w’imihigo harimo nko kurwanya isuri mu misozi ikikije Ikibaya cya Bugarama yangije ibikorwa by’ubuhinzi bukorerwa muri iki kibaya, kuvugurura no gusukura inyubako zo mu Mujyi wa Rusizi hagendewe ku gishushanyo mbonera nk’umujyi wunganira Kigali.

Umuboyozi w’Akarere ka Rusizi Kayumba Ephrem avuga ko ibyo babwiwe na guverineri ari ingenzi ndetse biyemeje kongera gusubira inyuma mu mihigo bari bateguye kugira ngo babashe kuyinoza ibe ikemura ibibazo by’abaturage nta wusigaye inyuma icyakora ntagaragaza impamvu byari byirengagijwe.

Akarere ka Rusizi mu manota y’imihigo aheruka y’umwaka 2019/2020 ni ko kaherekeje utundi,umwanya wa 30 n’amanota 50.01.

Guverineri Habitegeko uyobora ubu ni we wayoboraga akarere ka Nyaruguru kari kabaye aka mbere n’amanota 80.04. Akabayitezweho guhindura byinshi muri iyi ntara by’umwihariko muri aka Karere ka Rusizi.

Gatete Eric Rafiki