Guma mu Rugo i Kigali: Haracyaboneka urujya n’uruza mu mihanda

Mu gihe Umujyi wa Kigali uri muri gahunda mu rwego rwo gukumira ikwirakwira ry'icyorezo cya COVID19, bamwe mu baturage barasaba bagenzi babo gutinya iki cyorezo, bagashyira mu bikorwa amabwiriza ariho. Baravuga ibi mu gihe hakigaragara bakigendagenda, batanagiye muri serivisi zemerewe gukomeza gukora.

Hirya no hino mu ma karitsiye, mu mihanda mito n'iminini haracyagaragara urujya n'uruza rw'abantu. Hari ababa bagana ku masoko, ku mavuriro, ariko hakaba n'abandi usanga bicaye cyangwa bitemberera. Ababona iyi myitwarire barayinenga.

Inzego z'ibanze zifite inshingano zo gukangurira abaturage kubahiriza amabwiriza yatanzwe n'inzego nkuru z'igihugu. Nk'ubuyobozi bw'Umurenge wa Muhima mu Karere ka Nyarugenge bwashyizeho uburyo bwo guhwitura abaturage hifashishijwe inzego zinyuranye zikorera muri uwo murenge, kandi ngo biratanga umusaruro.

Uyu ni umunsi wa kabiri, umujyi wa Kigali ushyiriweho gahunda ya guma mu rugo nk'uko bikubiye mu mabwiriza y'inama y'abaminisitiri yateranye ku wa mbere w'iki cyumweru.

Abaturage basabwa kugabanya mu buryo bushoboka impamvu zituma bahura, hagakorwa ingendo mu gihe zikenewe kandi babanje kubisabira uruhushya inzego zibishinzwe.

John BICAMUMPAKA