Dr Mutimura yasabye abashakashatsi gukora ubushakashatsi bufite ireme

Kuri uyu wa Kane, Inama y’Igihugu y’Ubumenyi n’Ikoranabuhanga, yasabye abashakashatsi gukora ubushakashatsi bufite ireme, bugashyigikirwa kuko ikigega leta y’u Rwanda yabashyiriyeho cyaje kigamije gukemura ibibazo by’amikoro make byagaragazwaga n’aba bashakashatsi.

Mu nama yakozwe hifashishijwe uburyo bw’ikoranabuhanga igahuriza hamwe ingeri zitandukanye zirimo n’abashakashatsi, hagaragajwe ko Iki kigega cyo gushyigikira abashakashatsi kimaze gutanga umusaruro ku bakoze ubushakashatsi bufite ireme, kandi buhindura imibereho n’iterambere by’abaturage.

Umunyamabanga Nshingwa bikorwa w’inama y’igihugu y’ubumenyi n’ikoranabuhanga, Dr Mutimura Eugene yasabye abashakashatsi gukora ubushakashatsi bufite ireme kandi buri ku rwego mpuzamahanga, bwagirira akamaro abaturage kugira ngo barusheho kubyaza umusaruro iki kigega bashyiriweho na leta y’u Rwanda.

Inama y’igihugu y’ubumenyi n’ikoranabuhanga, igaragaza ko mu mwaka wa 2015 mu Rwanda habarurwaga abashakashatsi bakabakaba 250.