Dr Mujawamariya yasabye ko buri wese akwiye gufata iya mbere mu kubungabunga ibidukikije

Minisitiri w’Ibidukikije, Dr Jeanne d’Arc Mujawamariya atangaza ko ari uruhare rwa buri wese mu kubungabunga ibidukikije mu rwego rwo gufasha mu rugamba rwo guhangana n’ingaruka z’imihindagurikire y’ikirere no kubaka ubukungu n’iterambere ritangiza ibidukikije.

Yabigarutseho mu nama  yo ku rwego rwo hejuru n’abafatanyabikorwa yiga ku ngamba zivuguruye zo kubungabunga ibidukikije, no guteza imbere ubukungu butangiza ibidukikije ibera mu Rwanda.

Muri iyo nama umuyobozi w’ishami ry’umuryango w’abibumbye ryita ku iterambere mu Rwanda, UNDP Maxwell Gomera yemeza ko haba mu Rwanda no muri Afurika, ingaruka zo kwangiza ibidukikije n’imihindagurikire y’ibihe kuri ubu zigaragarira ya buri wese kandi hakenewe kugira icyakorwa vuba mu kubungabunga urusobe rw’ibidukikije.

Yemeza ko guverinoma ubwayo itabyishoboza ahubwo ko hakenewe gukomeza ubufatanye no gukorana n’abafatanyabikorwa batandukanye, mu guteza imbere ubukungu butangiza ibidukikije.

Minisitiri w’ikonanabuhanga na Innovation Ingabire Paula nawe agaragaza ko muri uru rugamba hakwiye kwitabwa ku ngingo yo gukora ubushakashatsi bwimbitse no gushyikira imishinga y’udushya mu kurengera urusobe rw’ibidukikije rwamaze kwangirika kuri ubu.

U Rwanda rwihaye intego yo kuba rwagabanyije ikoreshwa ry’inkwi, amakara n’ibindi bicanwa bikomoka ku bimera nka bimwe mu byangiza ibidukikije bikanatanga umwuka wangiza ikirere, rukava ku kigero cya 79.9% rwariho muri 2018 rukagera kuri 42% mu mwaka wa 2024.

Iyi ikaba ari ingingo igomba kwitabwaho kandi mu ngamba zivuguruye z’iterambere ritangiza ibidukikije no guhangana n’ingaruka z’imihindagurikire y’ikirere, ingamba u Rwanda rwihaye zihera muri 2011 kugeza muri 2050.