Abanyarwanda baba mu mahanga basobanuriwe amavu n'amavuko y'umuganura

Minisitiri w'Ububanyi n'Amahanga, Dr Vincent Biruta ndetse n'uw'urubyiruko n'umuco, Rosemary Mbabazi bagiranye ikiganiro n'abahagarariye u Rwanda mu bihugu bitandukanye ndetse n'Abanyarwanda baba mu mahanga cyibanze ku muganura.

Uyu munsi uzizihizwa ku wa Gatanu w'iki cyumweru, kimwe mu byibanzweho ni ugusobanura amavu n'amavuko y'umunsi w'umuganura. 

Minisitiri Mbabazi yashimye umusanzu ukomeye Abanyarwanda baba mu mahanga badahwema kugaragaza muri gahunda zitandukanye z'igihugu. 

Yababwiye ko umunsi w'umuganura ushimangira umuco n'amateka ahuriza hamwe Abanyarwanda ukaba ari n'umunsi wo kwishimira ibyo baba barakoze.

Bamwe mu Banyarwanda baba mu mahanga bashima uburyo u Rwanda nk'igihugu cyababyaye rukomeza kubakurikirana, ibi bigatuma na bo barushaho kurwiyumvamo no kururatira abandi. 

Bavuga ko biteguye kuzahura bakaganura ku byavuye mu mirimo y'amaboko yabo.

Dr Vincent Biruta yibukije Abanyarwanda ko umunsi w'umuganura ari umunsi wo gusabana bishimira ibyo bejeje cyangwa bagezeho, ariko kandi ukaba n'umwanya wo guhiga ibyo bifuza kugeraho. 

Yibukije Abanyarwanda kandi kuzasangira n'abaturanyi bazaba badafite ibyo baganura maze abifuriza umunsi mwiza w'umuganura.