Cardinal Kambanda yasabye ababyeyi gufatanya n'abarezi mu guha ubumenyi buboneye abana

Arkiyepiskopi wa Kigali, Antoine Cardinal Kambanda yasabye ababyeyi gufatanya bya hafi n'abarezi mu guha ubumenyi buboneye abana nk'imwe mu nkingi zizabafasha kwiteza imbere. 

Ibi yabigarutseho mu muhango wo kwizihiza yubile umuryango w'abihaye Imana st Famille de Helmet umaze ukorera mu Rwanda.

St famillle de Helmet ni umuryango w'abihaye Imana, ukora ibikorwa bitandukanye birimo uburezi, ubuvuzi ndetse n'ibindi bitandukanye.

Kuri uyu wa Gatandatu ubwo uyu muryango wizihizaga yubile, hanatangijwe ku mugaragaro ishuri ryawo complexe scolaire sainte famille d'helmet.

Uhagarariye ababyeyi muri iri shuri, Fulgence Bucyibaruta avuga ko ababyeyi bafite inshingano zo gufasha abana kugira ngo barusheho kumva amasomo.

Soeur Dancille Nyirasebura uhagarariye umunyaryango w'Ababikira mu Rwanda avuga ko intego y'uyu  muryango ari ugutanga uburezi bufite ireme buzafasha umwana mu iterambere.

Antoine Cardinal Kambanda yagarutse ku bufatanye bw'ababyeyi n'abarezi mu guha ubumenyi bukwiriye umwana, ndetse asaba ababyeyi by'umwihariko gukurikirana imyigire y'abana babo.

Uyu muryango ni umwe mu miryango igize kiliziya gatolika wibanda cyane ku burezi, ukaba ukorera ku migabane itandukanye, by'umwihariko watangiye gukorera mu Rwanda mu mwaka 1997.

Ntete Olive