Bamwe mu bashaka serivisi mu Mujyi wa Kigali baranenga bamwe mu bafunga amaduka mu minsi mikuru

Abasaba serivisi zitandukanye zirimo no guhaha mu Mujyi wa Kigali, baravuga ko imyumvire yo gufunga amaduka ku minsi mikuru no kuri konji ziyikurikira bikwiye guhinduka kugirango n'ubukungu bukomeze kuzamuka.

Umunsi mukuru wa Noheli ni umwe mu minsi isoza umwaka kandi yizihizwa na benshi, uyu mwaka mu kwizihiza uyu munsi byahuriranye n'impera z'icyumweru bituma hatangwa konji kuri uyu wa mbere nk'uko biteganwa n'amategeko.

Nubwo mu Mujyi wa Kigali hari bamwe mu bikorera bazindukiye mu mirimo yabo, ntibibujije ko hari abandi batigeze bafungura amaduka yabo ndetse bamwe mu bakiriya bahageze basanga imiryango ifunze, bibazaga niba bari bubone ibyo bakeneye.

Abagenda mu Mujyi wa Kigali barimo n'abaguzi basanga gufunga amaduka kuri za konji bidakwiriye kuko bihungabanya ubukungu.

Bamwe mu bakomeje ubucuruzi bwabo kuri uyu munsi w'ikiruhuko, basobanura ko muri iki gihe ari bwo abantu benshi bakenera guhaha ibintu bitandukanye kuko ari bwo baba baruhutse.

Ibi kandi ngo binafite icyo bivuze ku basanzwe bahemberwa imirimo bakora ku munsi kuko byongera igihembo cyabo.

Mu gihe cy'iminsi mikuru isoza umwaka, abenshi mu basanzwe baba mu Mujyi wa Kigali bahitamo kwizihiza iyi minsi mikuru bari kumwe n'imiryango yabo iba hanze ya Kigali. 

Muri iyi minsi kandi abagenzi baba ari benshi kuko basa n'aho baba bagendeye rimwe, abayobozi ba za kompanyi zitwara abagenzi bemeza ko no muri iyi minsi abagenzi bakiri benshi ariko bakora uko bashoboye bakabatwara.

Ku rundi ruhande ariko abagenzi bavuga ko gutega imodoka muri iki gihe cy'iminsi mikuru biba biteye impungenge zo kubona imodoka kubera ubwinshi bw'abagenzi.

Abasesengura ibijyanye n'ubukungu, basanga gukora amasaha menshi ari kimwe mu bituma abacuruzi barushaho kugurisha byinshi bityo bikanazamura ubukungu biciye mu misoro ndetse no gutanga imirimo ku bantu benshi.

Jean Claude Mutuyeyezu