BURI MWAKA HAKIRWA IBIREREGO 150 BY'ABAKOZI BAHUYE N’AKARENGANE

Abahagarariye amasendika y'abakozi mu Rwanda bahangayikishijwe n’imwe mu mibereho y'abakozi bo mu bigo by'abikorera n'ibya Leta.

Francois Ntakiyimana Umunyamabanga mukuru wa Syndika COTRAF inganda n'ubwubatsi avuga ko buri mwaka bakira ibirego 150 by'abakozi bahuye n'aka karengane, bakabafasha mu by'amategeko.

Asobanura ko abakoresha batsinzwe bishyura abakozi babo, ariko nabo bakaba bafite imbogamizi z'uko hari abakoresha b'abanyamahanga bigorana kubishyuza kuko bahita bisubirira mu bihugu byabo.

Ibibazo bikomeye Ntakiyimana avuga ko bikibangamye abakozi bagaragaza birimo abakozi bakora nta masezerano bakirukanwa n'abakoresha nta nteguza, gukora amasaha y'ikirenga badahemberwa, abakoresha birukana abakozi bitwaje ikibazo cy'ubukungu bwagabanutse, kudateganyiriza abakozi, ndetse n'ikibazo cy'ingutu ku mpanuka zikomeje guhitana abakozi bo mu birombe imiryango yabo ntishumbushwe ndetse n'ubwambuzi.