Amb Karabaranga yashyikirije Col. Assimi Goita impapuro zimwemerera guhagararira u Rwanda muri Mali

AGEZWEHO

  • Muri Nyagatare hatashywe ibikorwaremezo bifite agaciro karenga miliyoni 80 Frw – Soma inkuru...
  • Perezida Kagame yageneye inkunga abaturage basenyewe n’ibiza muri Gisagara – Soma inkuru...

Amb Karabaranga yashyikirije Col. Assimi Goita impapuro zimwemerera guhagararira u Rwanda muri Mali

Yanditswe Dec, 18 2021 17:18 PM | 94,679 Views



Ambasaderi Jean Pierre Karabaranga uhagarariye u Rwanda mu bihugu bya Senegal, Mali, Guinea Bissau, Gambia na Cabo Verde yashyikirije Colonel Assimi Goita, Perezida w’Inzibacyuho wa Mali impapuro zimuhesha uburenganzira bwo guhagararira u Rwanda muri Mali.

Ambasaderi Jean Pierre Karabaranga yamugejejeho ubutumwa bwa mugenzi we w’u Rwanda  Perezida Paul Kagame, amwifuriza we n’abaturage bose ba Mali ishya n’ihirwe. 

Ambasaderi Karabaranga kandi yamumenyesheje ko azarushaho gushimangira umubano mwiza uri hagati y’Ibihugu byombi no gukomeza ubutwerane n’ubuhahirane.

Perezida Colonel Assimi GOITA yijeje Ambasaderi Jean Pierre Karabaranga ubufatanye mu gusohoza neza inshingano yahawe na Kagame, anamusaba kumugezaho indamukanyo ye kandi ko Igihugu cye kizakomeza gushimangira umubano mwiza uri hagati y’Ibihugu byombi.

Perezida Colonel Assimi GOITA yanamugaragarije ko ashima cyane ubuyobozi bwiza bwa Perezida Paul Kagame  by’umwihariko bwazanye impinduka zigamije iterambere ry’u Rwanda n’Umugabane wa Afurika muri rusange; ubu u Rwanda rukaba ari intangarugero mu kwihesha agaciro no guharanira kwigira.

Ambasaderi yanahuye n’Abanyarwanda batuye n’abakorera muri Mali abagaragariza byinshi u Rwanda rwagezeho nyuma ya Jenoside yakorewe Abatutsi mu 1994 bishingiye ku bufatanye bw’Abanyarwanda mu kwishakamo ibisubizo, byose byubakiye ku mutekano n’ubumwe bw’Abanyarwanda. Yabagaragarije ko u Rwanda ruha agaciro gakomeye Umunyarwanda wese aho ari bityo nabo bakaba bakwiye kurangwa n’indangagaciro zirimo gukunda igihugu cyabo.

Jean Claude NDAYISHIMYE



Ba uwambere gutanga igitekerezo

Tanga igitekerezo:



RSS FEED