Amateka yaranze Padiri Ubald Rugirangoga: Agahinda ku bo yomoye ibikomere

Imwe mu miryango yiyunze nyuma ya Jenoside yakorewe Abatutsi binyuze muri gahunda y'ubumwe n'ubwiyunge n'isanamitima yatangirijwe muri Paruwasi ya Mushaka na Padiri Ubald Rugirangoga,yavuze ko yababajwe cyane n'urupfu rwe ariko ishimangira ko nta kizahagarika iyi gahunda.

Ntibyoroshye kuri bamwe mu bari bazi Padiri Ubald kwemera ko atakiri mu isi y’abazima. Muri  paruwasi ya Mushaka bari bamaranye imyaka 11 bari mu  bashenguwe n’urupfu rwe.

Sinzabakwira Straton w’i Nyamasheke mu Murenge wa Karengera,aho padiri Ubald avuka, ari mu bagize uruhare mu iyicwa rya bamwe mu bagize umuryango wa Padiri Ubald Rugirangonga muri jenoside yakorewe abatutsi, nyamara Ubald aramubabarira agerekaho no kumwishyurira abana amashuri.Uyu na we arasa n’uwahungabanye

Padiri Ubald yitabye Rurema yari amaze imyaka 11 muri Paruwasi ya Mushaka aho yatangirije urugendo rw'isanamitima binyuze mu gusaba imbabazi no kuzitanga no kuvugisha ukuri mu komora ibikomere bituruka kuri jenoside yakorewe abatutsi.

Iyo gahunda yaharuriye inzira  umusaza Nikuze Nicolas utari worohewe no gusaba imbabazi abo yiciye ababo muri jenoside yakorewe abatutsi,bikaba ari na ko  byari bimeze kuri Mukambayiha Anne Marie  wari akirwana n’umutima yibaza aho bizaca ngo ahe imbabazi abamuhekuye bakanamupfakaza.

Muri rusange imiryango irenga 300 yakize ibikomere iriyunga binyuze muri iyo gahunda y’isanamitima,ibintu byanatumye agirwa umurinzi w’igihango, none icyorezo Covid 19 kiramuhitanye kandi yari igikomeje.

Kuri benshi,igikurikiyeho  ni ukwibaza ahazaza h’iyi gahunda. Ariko Rwabugiri Simeon, Padiri mukuru wa paruwasi ya Mushaka iyi gahunda yatangirijwemo yavuze ko nta kizayihagarika.

Abenshi mu bari bamuzi,baremeza ko atazava mu mitima yabo. Ku ibanga ry’amahoro,aho abaturutse imihanda yose y’isi baza gusengera no kwakira ibitangaza, ndetse hakaba hanamwitirirwa kuko ari we wahatangije, n’ubu baraza kuhasengera ariko bafite agahinda.

Kuva muri Werurwe umwaka ushize,Padiri Ubald yari mu butumwa muri Leta zunze Ubumwe za Amerika, arko mu  kwezi k’Ugushyingo,bimenyekana ko arwaye Covid 19 aza no kuyikira icyakora isiga imuhungabanyije mu myanya y’ubuhumekero. Inkuru ko yitabye Imana yamenyekanye mu gitondo cyo ku wa gatanu tariki ya 8 uku kwezi kwa mbere 2021, aguye aho muri Leta zunze ubumwe za Amerika.

Theogene TWIBANIRE