Amafoto: Perezida Kagame yakiriye mu karere ka Rubavu mugenzi we wa Kongo Félix Tshisekedi

Kuri uyu wa Gatanu mu karere ka Rubavu, Perezida Paul Kagame yakiriye Antoine Félix Tshisekedi wa Repubulika Iharanira Demokarasi ya Kongo, uri mu Rwanda mu ruzinduko rw'akazi rw'umunsi umwe.

Akigera ku mupaka wa La Corniche, Félix Tshisekedi  yakiriwe na mugenzi we w'u Rwanda Paul Kagame,  bahita bajyana mu modoka.

Abakuru b'ibihugu byombi basuye ibice bitandukanye by'Umujyi wa Rubavu banirebera ingaruka zatewe n'imitingito yaturutse ku iruka ry'ikirunga cya Nyiragongo, banagirana ibiganiro bonyine(tête a tete).

Biteganyijwe ko ku munsi w'ejo ku wa Gatandatu, Perezida Kagame nawe azagirira uruzinduko i Goma muri Repubulika Iharanira Demukarasi ya Kongo.

Nyuma yo gusura tumwe mu duce twagizweho ingaruka n'iruka ry'ikirunga cya Nyiragongo, biteganyijwe ko abakuru byombi bazagirana ikiganiro n'abanyamakuru.

Biteganyijwe kandi ko intumwa z’ibihugu byombi zizashyira umukono ku masezerano, mu rwego rwo kurushaho gushimangira umubano w’u Rwanda na RDC.

Jean Pierre Kagabo