Abaturage bahawe akazi muri VUP mu Karere ka Huye baravuga ko byabahinduriye ubuzima

Abaturage bahawe akazi muri gahunda ya  VUP mu Karere ka Huye mu Murenge wa Gishamvu, bavuze ko byahinduye ubuzima bwabo, aho ndetse bamwe muri bo bagenda bazamuka mu byiciro by'ubudehe barimo, bitewe n'iterambere bamaze kugeraho mu miryango yabo.

Aha mu Murenge wa Gishamvu abahabwa akazi muri VUP, akenshi usanga bakora imihanda no gutunganya  amaterasi yikora mu misozi ihanamye.

Kugeza ubu bamaze gutunganya  hegitari zisaga 30,  ibi bikaba byaragabanyije ikibazo cy'isuri yatwaraga imyaka yabo n'imirima.

 Aba bakora mu mirimo ya VUP ku munsi bahembwa amafaranga 1200, bakaba bakora kuva saa kumi n’ebyiri za mu gitondo kugeza saa sita z’amanywa, bakabona umwanya wo kujya gukora mu ngo zabo.

Umunyambanga Nshingwabikorwa w'Umurenge wa Gishamvu, Nkubana Vianney avuga ko mu mirimo ya VUP bafite abaturage bagera kuri 527, ibi  ngo bikaba bigenda bifasha mu kuzamura imibereho y'abaturage bo muri uyu Murenge.