Abaturage 123 bo muri Muhanga bemerewe kongera kwandikwa mu bitabo by'irangamimerere

Kuri uyu wa Gatanu, abaturage 123 bo mu Murenge wa Mushishiro w'akarere ka Muhanga, bishimiye umwanzuro w'urukiko rwa Nyamabuye ubemerera kongera kwandikwa mu bitabo by'irangamimerere.

Aba baturage bavuga ko baherukaga muri ibi bitabo mu myaka ya 1997/1998.

Batangaza ko itwikwa ry'ihahoze ari Komini Buringa bikozwe n'abacengezi muri iyo myaka yombi, aribyo byatumye haba intandaro yo kubura kw'ibitabo by'irangamimerere.

Abaturage 123 nibo bemerewe kongera kwandikwa, mu gihe abari bagaragaje ikibazo bari 866 barimo 722 bo muri Mushishiro gusa.

Hari abandi bari mu ifasi y'urukiko rwa Kiyumba izakurikirana ikibazo cyabo, naho abandi  bazakomeza kugana inkiko kuko basezeranye mbere ya 1997 cyangwa nyuma ya 1998.

Gahunda yo kwegereza abaturage ubuyobozi, nayo ngo yatumye ibyangombwa bimwe bitakara kubera guhuza Imirenge n'Amakomine.

Jean Claude Mutuyeyezu