Abatumiza ibicuruzwa binyuze ku cyambu cya Rubavu barasaba ko kubaka iki cyambu byihutishwa

Abatumiza ibicuruzwa byiganjemo Sima bituruka mu karere ka Rusizi binyuze ku cyambu cya Rubavu, baravuga ko inzira  y’amazi yoroheje ubucuruzi bwabo, ariko bagasaba ko imirimo yo kubaka iki cyambu ku buryo bugezweho yakwihutishwa kuko yatuma barushaho guhahirana n'utundi turere ndetse n'amahanga muri byinshi.

Mu masaha y’igitondo, RBA yageze ku cyambu cya Rubavu ahazwi nko kuri brasserie mu karere ka Rubavu.

Amato manini atatu apakiye sima aturutse mu karere ka Rusizi aparitse ku nkombe z’ikiyaga cya Kivu.

Abasore b’imbaraga bari mu kazi ko gupakurura imifuka ya sima mu cyombo bayijyana mu makamyo, buri umwe aratwara ku rutugu nibura imifuka 2 igizwe n’ibiro 100, bakaba bavuga ko iki cyambu cyahinduye ubuzima bwabo.

Bamwe mu batumiza ibicuruzwa biva mu karere ka Rusizi birimo sima, nabo bemeza ko inzira y’amazi yoroheje ubucuruzi bwabo.

Ubwo aheruka gusura aho ibikorwa bigeze byo kubaka iki cyambu, Minisitiri w’Ibikorwaremezo, Amb. Claver Gatete yasabye ko byakwihutishwa kugira ngo gitange umusaruro cyitezweho.

Iki cyambu cya Rubavu kiri mushinga mugari wo kubaka ibyambu mu turere 5 dukora ku kiyaga cya Kivu, washowemo angana na miliyari 11 z'amafaranga y'u Rwanda. 

Usibye kuba  ibi byambu bizatanga akazi ku bantu benshi, byitezweho no kuzoroshya ubuhahirane hagati y u Rwanda na DRC hakoreshejwe inzira y'amazi.

Niyibizi Didace