Abasenateri baba muri RPF basabwe kudashyira inyungu zabo imbere

Umuryango FPR Inkotanyi wasabye abasenateri bawukomokamo kwirinda kugwa mu mutego wo kwishakira inyungu zabo bwite ndetse no kwibuka ko u Rwanda rwahisemo politiki y’ubwumvikane.

Umuryango FPR Inkotanyi wahaye Abasenateri impamba izabafasha mu nshingano zabo harimo n’izitoroshye  kurinda amahame remezo akubiye mu itegeko nshinga.

Mu Rwanda, Abasenateri ntibatorwa hashingiwe ku mitwe ya politiki ariko FPR yahisemo guhuza abanyamuryango bayo bagiriwe icyizere cyo kuba abasenateri ibaha impanuro zizabafasha mu kazi kabo,makazi bamaze amezi 3 batangiye.

Umunyamabanga Mukuru wa FPR, Ngarambe Francois yahamagariye izi ntumwa za rubanda kurangwa no gushyira imbere inyungu z’abaturage.

Senateri Dushimana Lambert avuga ko ibi biganiro ari impamba ikomeye izabafasha gusohoza inshingano zabo naho Visi Perezida wa Sena Nyirasafari Esperance agashimangira ko ikoranabuhanga ari kimwe mu bintu by’ ingenzi bizabafasha.

Ku bijyanye n’imikoranire ya Guverinoma n’Inteko Ishinga amategeko,Umunyamabanga Mukuru w’umuryango FPR Inkotanyi Ngarambe Francois yasabye abasenateri kugirana n’abagize guverinoma mu rwego rwo kureba ibiri mu nyungu z’igihugu.

Sena y’u Rwanda igizwe n ‘abasenateri 26 barimo 12 batorerwa mu  ntara n’Umujyi wa Kigali, 2 batorerwa muri Kaminuza n’amashuri makuru ya Leta n’ay’abikorera, 4 batorerwa mu Ihuriro nyunguranabitekerezo ry’imitwe ya politiki yemewe mu Rwanda, n’umunani bashyirwaho na Perezida wa Repubulika.

Bosco KWIZERA