Abarokokeye muri St Paul bashimiye ubutwari bw’ingabo z’Inkotanyi zabarokoye abicanyi

Abarokokeye jenoside yakorewe Abatutsi mu kigo cya St Paul mu Mujyi wa Kigali, bavuga ko bumvaga kubaho bitagishobotse kubera ubwicanyi bw'indengakamere bwahakorewe tariki 17 Kamena mu 1994, ariko kubera ingabo z’Inkotanyi barokotse kandi bakomereza ubuzima mu gihugu bishimira.

Mu buhamya bwatanzwe n'abari bahungiye muri St Paul bakaza kurokoka, basobanura inzira y'umusaraba baciyemo ariko bakaza gutabarwa n’Inkotanyi.

Uwitwa  Dimitrie Sissi waharokokeye yagize ati “Inkotanyi zari zaraye zije gukura abantu muri St Paul zirabatwara noneho Interahamwe zirabimenya zirarakara, zaje ziyemeje ko nta muntu ziri busige inyuma zica abantu benshi cyane, icyo gihe ni bwo baje binjira mu kiliziya  n’ahandi hose haturanye, bishe uwo bahuye na we wese ntabyo gutoranya, bishe abantu benshi cyane, aha turi habaye ibintu bibi.”

Uretse kurokoka mu buryo bafata nk’ubutangaje, bishimira ko ubuzima bwaje gukomereza mu gihugu gifite ubuyobozi bwiza.

Ati “Nishimira ko narokotse nkarokorwa n'Inkotanyi kandi nyuma nkazibona tugakomeza tukubaka igihugu cyiza,  kizira amacakubiri n'izindi jenoside.”

Uhagarariye imiryango y’abiciwe kuri St Paul,  Mukabyagaju Marie Grace avuga ko ubu icyizere cy’ahazaza h’u Rwanda hashingiye ku rubyiruko.

Yagize ati “Bafite inshingano yo kubaho ahabo, ah’ababyeyi n'abavandimwe babo batagihari, ikindi ni uguharanira kusa ikivi ababo bagiye batushije, urubyiruko rero bagomba kubaho bagakomera, bakabaho neza, bakabaho gitwari bakaba abagabo n'abagore bahesha ishema abavandimwe n'ababyeyi bishwe urw’agashinyaguro.”

Abarokokeye kuri St Paul bavuga ko hiciwe abantu benshi ariko kuri iyi tariki, bikaza kuba umwihariko kuko hishwe abatutsi basaga 300.

Uwitonze Providence Chadia