Abarobyi b’isambaza mu Kivu bavuze ko zabaye nke

Nyuma y’amezi arenga 2 ikiyaga cya Kivu gifunze, uyu munsi abarobyi bongeye gusubira kuroba gusa byaba abarobyi n’abacuruzi b'isambaza, baravuga ko zabaye nke bagereranyije n’uko bajyaga bazibona iyo bafunguraga.

Bavuze ko Ibase bajyaga bagura amafaranga ibihumbi 20 ubu barimo kuyigura ibihumbi 40.

Abo RBA yasanze ku Kivu bamwe bari bafite isambaza nke abandi ntazo bafite, ndetse n'abazibonye bavuga ko zabahenze aho ibase y'isambaza bayifatiraga ibihumbi 20 ubu bayifatiye ibihumbi 40

Uku kutaboneka kw'isambaza ngo biratuma n'igiciro kizamuka, mu gihe hari abibwiraga ko kigiye kumanuka

Dr Robert Gatare ushinzwe uburobyi n'ubworozi muri RAB mu ntara y'Uburengerazuba, avuga ko umusaruro wabaye muke uyu munsi kuko abarobyi batangiye batinze ariko umusaruro uzagenda wiyongera.

Ubuyobozi bwa RAB bugaragaza ko uyu munsi harobwe Toni 2 n'ibiro 120, mu gihe ubushize barobye Toni 3 n'ibiro 750.

Uku kugabanuka ngo kwatewe ahanini n'ivugurura ry'amakoperative n’amakipe y’abarobyi.

Jeannine Ndayizeye