Abarimu bagera ku 70000 mu gihugu batangiye itorero ry'indemyabigwi

Abarimu babarirwa mu bihumbi 70 mu gihugu hose bagiye kujya mu itorero ry'abarezi.

Bamwe mu bavuganye na RTV bavuga ko biteze gukarishya ubwenge ku nyigisho zijyanye n'indangagaciro nyarwanda, bakemeza ko bazarushaho gusobanukirwa n'uburyo bakwigisha amateka y'u Rwanda, bikazabafasha no guhangana na bamwe bagifite ingengabitekerezo ya Jenoside ndetse bakayikwirakwiza no mu rubyiruko rw'abanyeshuri.

Aba barimu bavuga ko biteguye no kuganiriza ibibazo byabo abayobozi bazabasura, bakabaza icyo bateganyirizwa ku kunoza imibereho myiza yabo, ikibazo cy'abigisha umubare munini w'abanyeshuri mu ishuli rimwe, ndetse bamwe bavuga ko bazasaba ko bakomeza guhugurwa ku birebana n'integanyanyigisho kugira ngo bakomeze gutanga ubumenyi bufite ireme.

Iri torero rifite insanganyamatsiko igira iti ''uruhare rw'umurezi mu kubaka u Rwanda twifuza".