Abanyeshuri basaga ibihumbi 38 muri Huye batangiye guhabwa urukingo rwa kabiri ku bigo byabo

Akarere ka Huye gafatanyije n'inzego z'ubuzima ndetse n'abanyeshuri biga ubuganga muri Kaminuza y'u Rwanda ishami rya Huye, batangiye ibikorwa byo gukingira abanyeshuri Covid19 ku bigo bitandukanye bigaho.

aba banyeshuli barishimira iki gikorwa  kuko bibafasha kubona inkingo badataye amasomo yabo.

Hamwe muho RBA yageze ni ku kigo cya GS Kabuye giherereye mu Murenge wa Maraba, aho abanyeshuli bishimiye iki gikorwa cyabegerejwe kuko ngo bitasaba gutakaza amasomo yabo.

Umuyobozi w'iki kigo, Théophile Ntigura asobanura ko kuba bahawe itsinda rinini ribafasha gukingira, byatumye umubare w'abanyeshuri basaga 800 bagombaga guhabwa inkingo bazibona kandi mu gihe gito.

Umuyobozi w'ikigo nderabuzima cya Maraba, Habumugisha Faustin avuga ko kuba bafatanyije n'inzego zitandukanye byatumye babasha gukingira abanyeshuri benshi, kuko bitahungabanyije imitangire ya serivisi kwa muganga ku bandi barwayi.

Umuyobozi w'akarere Ka Huye wungirije ishinzwe imibereho myiza y'abaturage, Kankesha Annociate aravuga ko nubwo akarere ka Huye ari kamwe mu turere dufite ibigo byinshi by'amashuri, hari icyizere ko iki gikorwa kizihutishwa.

Aba banyeshuri bakingiwe ni abafite imyaka 12 kuzamura, bakaba abenshi bahawe urukingo rwa 2, gusa bake bacikanywe batabonye urwa mbere nabo baruhawe, mu gihe abarezi bo bahawe urukingo rwa 3 rwo gushimangira.