Abanyeshuri basaga 190,000 batangiye ibizamini bya leta

Kuva kuri uyu wa Kabiri, abanyeshuri basaga 190,000 batangiye ibizamini  bya leta, bakaba bishimiye gukora ibizamini bisoza icyiciro rusange n’umwaka wa 6 w’amashuri yisumbuye.

Bagisohoka mu cyumba bakoreragamo ikizamini cy'imibare, bamwe mu banyeshuri bo mu kigo cy'amashuli cya Nyagasambu kiri mu karere ka Rwamagana, ntibazuyaje kwemeza ko bazatsinda bitewe nuburyo bari bamaze kubikora.

Rubaduka Gervais, umubyeyi  ufite umwana urimo gukora ibi bizamini bisoza icyiciro rusange, avuga  ko nk'ababyeyi bagerageje korohereza abana babo kwiga nyuma yo kumara umwaka wose w'impfabusa.

Mu gihe hari gahunda ya guma mu rugo, leta yishingiye ikiguzi cyo gukura abana mu ngo zabo bajya kuri ibyo bigo, banasubirayo kuko hari bisi 151 zateganyijwe.

Ni ibizamini bikozwe mu gihe isi n'u Rwanda rurimo byugarijwe n'icyorezo cya COVID-19, ku buryo hari n'abanyeshuri 106 bagiye gukora ibi bizamini baranduye iki cyorezo.

Umuyobozi Mukuru w'ikigo cya leta gishinzwe ibizamini bya leta n'igenzura ry'amashuri Bernard Bahati, avuga ko abo banyeshuri barimo gufashwa, ku buryo nabo babikoze neza.

Ibi bizamini bizasozwa ku tariki 27 z’uku kwezi bizakorwa n’abanyeshuri 195,987 bo mu mashuri y’icyiciro rusange, amashuri y’isumbuye n’imyuga n’ubumenyi ngiro.

Harimo abakandida bigenga 1930.

Bosco Kwizera