Abanyeshuri barenga ibihumbi 122 nibo bazakora ibizamini bya leta bisoza icyiciro rusange

Ikigo cy'igihugu gishinzwe ibizamini bya leta n'isuzuma mu mashuri NESA, kiravuga ko abanyeshuri barenga gato ibihumbi 122 aribo bazakora ibizamini bya leta bisoza icyiciro rusange cy'amashuri yisumbuye, naho abiga mu mashuri y'ubumenyingiro bakaba ari ibihumbi 22.

Abazakora ibizamini bisoza amashuri yisumbuye bo barenga ibihumbi 52, bikaba biteganyijwe ko ibizamini bya leta bisoza icyiciro rusange cy'amashuri yisumbuye bizatangira tariki ya 20 z'uku kwezi.

Iki kigo cyasabye ababyeyi bafite abana bitegura ibizamini bya leta, kwigomwa imirimo babahaga mu biruhuko kugira ngo babone umwanya wo kwiga kugira ngo hatabaho icyuho hagati yabo n'abiga bacumbikiwe ku bigo.

Abanyeshuri bo mu turere twa Gisagara, Huye, Nyaruguru na Nyamagabe mu Ntara y'Amajyepfo ndetse no mu turere twa Nyamasheke, Rusizi, Karongi, Rutsiro mu Ntara y'Iburengerazuba ndetse n'abiga mu Mujyi wa Kigali, ni bo batangiye gusubira mu miryango yabo kuri uyu wa Kane.

Aba banyeshuri bavuga ko bari bafite impungenge z'ukuntu bazagera mu miryango yabo, kuko bari barumvise amakuru ko ingendo zihuza uturere zibujijwe.

Ishimwe Charmante umwe muri aba banyeshuri yagize ati “Nta  cyizere nari mfite ko duhita dutaha, ndasaba bagenzi banjye ngo dukomeze twirinde kuko icyorezo kirahari kuko niboneye abarwaye iyi ndwara.”

Ibikorwa byo gucyura aba bana birakorwa hakurikizwa ingamba zo kwirinda COVID-19, kandi bizamara iminsi ine.

Umuyobozi ushinzwe kugenzura Services zo gutwara abantu mu kigo ngenzuramikore RURA, Anthony Kuramba yizeza ko ibi bikorwa bizagenda neza kandi agasaba ababyeyi nabo kwitegura kwakira abana cyane cyane bakomeza kubarinda Covid19.

Yagize ati “Nta mpungenge dufite kuko  iki gikorwa kirimo kugenda neza kandi turimo gukora ibishoboka byose, tukagikora duharanira ko abana tubarinda icyorezo, ariko aho bagiye mu rugo turasaba ababyeyi kudufasha bakarinda abana bakaguma mu ngo zabo ntibazerere, kuko iki cyorezo kirakomeye nabo barimo kubibona.”

Nubwo bamwe mu banyeshuri batashye hari abandi bagumye ku mashuri bitegura ibizamini bya leta.

Umuyobozi mukuru w' ikigo cy' igihugu gishinzwe ibizamini bya leta n' isuzuma mu mashuri (NESA), Bahati Bernard asaba ababyeyi gufasha abana kwitegura neza.

Ati “Icyo dusaba ababyeyi ni ugukomeza gufasha abana barimo kwitegurira ibizamini mu rugo, byaba ngombwa hakagira imirimo bagakoze ntibayikore bityo bakabona umwanya wo kwitegura.”

Avuga ko igihe gisigaye ari gito cyane, hakaba ngo hari icyizere ko  abari ku ishuri batazasiga abarimo kwitegurira mu rugo.

Fiston Felix Habineza