Abantu 12 bafatiwe muri Motel barenze ku mabwiriza yo kurwanya COVID-19

Polisi y'u Rwanda yaraye ifashe abantu 12 barenze ku mabwiriza yo kurwanya ikwirakwizwa rya COVID-19, kuko bari begeranye banywera inzoga muri Mojo Palace Motel iherereye mu kagari ka Rubirizi mu Murenge wa Kanombe mu Karere ka Kicukiro.

Aba bantu bafashwe mu gihe amabwiriza yo kurwanya ikwirakwira ry'iki cyorezo avuga ko nta birori cyangwa imihango iyo ariyo yose yemewe ihuriza abantu hamwe.

Umuyobozi Nshingwabikorwa wungirije w'Akarere ka Kicukiro, Rukebanuka Adalbert, yatangaje ko atari ubwa mbere iyi motel ifatirwa mu makosa nk’aya ndetse ikaba yahise ifungwa. Arakangurira abaturage kureka gukina n'iki cyorezo cyica bakubahiriza amabwiriza yo kucyirinda.

Umuvugizi wa Polisi CP John Bosco Kabera yibukije abihisha cyangwa bakikingirana mu tubari cyangwa mu byumba bya hotel, motel n'ahandi bibwira ko bari kure ya Polisi itababona, bibeshya kuko bazafatwa ku bufatanye n'abaturage.

Abafashwe bajyanwe kuri Stade ya IPRC Kicukiro bapimwa COVID-19 banacibwa amande nk'uko amabwiriza abiteganya.