Abakoresha umuhanda Muhanga-Ngororero-Mukamira barasaba ko kuwutunganya byihutishwa _ AMAFOTO

Abakoresha umuhanda Muhanga- Ngororero-Mukamira wafunzwe n'inkango mu rukerera rwo kuri uyu wa Kane tariki ya 5 Gicurasi 2022, barasaba ko ibikorwa byo kuwutunganya byakwihutishwa ukongera ukaba nyabagendwa kuko wafunze ubuhahirane bw'utu turere n'imodoka zijyana ibicuruzwa i Goma.

Aba baturage bavuga ko hakongerwa imashini zikuramo ibitaka kuko bakurikije uko biri gukorwa nta cyizere bafite cy'uko uyu munsi uyu muhanda wokongera kuba nyabagendwa. Kuri ubu imashini imwe ikuramo ibitaka niyo iri gukora bakavuga ko ugereranyije n'ubwinshi bw'ibitaka, iyi mashini itabirangiza vuba.

Abafite ibinyabiziga byari bitwaye ibicuruzwa kugeza ubu baracyategereje ko ibitengu byafunze umuhanda byakurwamo.

Abacuruzi bavaga I Muhanga na Ngororero bajyanye ibicuruzwa i Goma Muri Congo n'abajyaga i Kigali bavuga ko bahuye n'igihombo gikomeye nyuma y'ibi biza.

Iyi nkangu kandi yasenyeye abaturage barindwi (7) bari bafite inzu z'ubucuruzi kuri uyu muhanda.