Abakoresha moto zikoresha amashanyarazi barasaba ko hakongerwa aho zishyirirwamo umuriro

Bamwe mu bakoresha moto zikoresha umuriro w’amashanyarazi, barasaba ko hakongerwa aho zishyirirwamo umuriro mu rwego rwo kuborohereza gukora neza.

Kuva muri Kanama umwaka ushize, nibwo mu Rwanda hatangiye gukoreshwa moto zikoresha umuriro w’amashanyarazi mu mwanya wa lisansi.

Bamwe mu bakoresha izi moto bahamya ko zifite inyungu ugereranyije n’izo bari basanganywe, gusa bagasaba ko hakongerwa aho gusharija izi moto

Mu rwego rwo gufasha abatwara abagenzi kuri moto kubona izi moto ku bwinshi, ikigo Rwanda electric motor ku bufatanye n’Ikigo cy'Igihugu gishinzwe kubungabunga ibidukikije, REMA barimo guhindura moto zari zisanzwe zikoresha moteri, zigakoresha umuriro w’amashanyarazi.

Umuyobozi wa Rwanda electric motor, Donald Kabanda Rukotana asobanura ko hari inkunga izabafasha muri iyi gahunda.

Ati “Abaterankunga batera inkunga abamotari hanyuma twe tukabaha serivisi zo kubahindurira. Serivise tubaha zigura hagati y’amadorari 700 na 800 ayo niyo mafaranga umumotari ashobora kwishyura igihe tutabonye inkunga.”

Minisitiri w’Ibidukikije, Dr Mujawamariya Jeanne d’Arc avuga ko uyu mushinga wo guhindura moto ndetse n’imodoka ugamije kugabanya imyuka ihumanya ikirere.

Yagize ati ‘’Ni umushinga wo gushyira mu bikorwa ibyo perezida yemereye abanyarwanda, ibyo tuzafatanya n’abikorera ni ukongera aho gucaginga izi moto hakarenga hatatu hasanzweho.’’

Mu Rwanda habarurwa moto ibihumbi 46 zitwara abagenzi, uyu mushinga uzahera kuri moto ibihumbi 26 zikorera mu Mujyi wa Kigali

Mbabazi Dorothy