Abagenzura umutungo w'umutwe wa politiki barasabwa kutawitiranya n'uwabo

Abashinzwe kugenzura umutungo w'umutwe wa politiki mu Rwanda barasabwa kurushaho kwitwararika no kutitiranya umutungo bacunze n'uwabo bwite ndetse bagatangira raporo ku gihe kugira ngo hatagira n'undi wagerageza kuwunyereza.

Ibi babisabwe kuri uyu wa Gatanu mu mahugurwa barimo agamije kubongerera ubushobozi ku micungire myiza y'umutungo n'imari by'umutwe wa politiki.

Inzego zitandukanye zirimo Urwego rw'Imiyoborere (RGB), Urwego rw'Umuvunyi zahagurukiye rimwe mu gufasha aba bashinzwe kugenzura umutungo w'imitwe ya politiki neza.

Umunyamabanga Nshingwabikorwa w’Ihuriro Nyunguranabitekerezo ry’Imitwe ya Politiki yemewe mu Rwanda, Burasanzwe Oswald avuga ko uru rwego rw’abagiye kujya bacunga umutungo w’amashyaka ari rushya ndetse ko ruzacyemura byinshi.

Raporo y'Urwego rw'Umuvunyi yakozwe hagati ya 2014 na 2018 igaragaza amakosa yakozwe n'amwe mu mashyaka ya politi nk'Ishyaka Green Party bigeze gusanga ryarakiriye ibikoresho by'impano bifite agaciro ka miliyoni zirenga 4 maze iri shyaka ririnumira kandi ibi ngo ntibyemewe.

Ishyaka riharanira ukwishyira ukizana kwa buri muntu, PL, ryo hari ubwo ryagurije amafaranga bamwe mu bayobozi nta mpapuro zibisobanura.

Senateri Karangwa Chrysologue wo mu Muryango FPR Inkotanyi yavuze ku ngaruka zishobora guterwa n’imicungire mibi y’umutungo w’amashyaka ya politiki.