Abadepite bemeje umushinga w'itegeko rishyiraho umusoro ku musaruro

AGEZWEHO

  • Abasirikare 150 b’Abaholandi bari mu mahugurwa mu Rwanda – Soma inkuru...
  • Ahahoze inkambi y’impunzi ya Gihembe hatangiye gusubiranwa mu rwego rwo kuhabungabunga – Soma inkuru...

Abadepite bemeje umushinga w'itegeko rishyiraho umusoro ku musaruro

Yanditswe Nov, 10 2021 18:51 PM | 102,383 Views



Inteko Nshinga Amategeko umutwe w'Abadepite, yemeje umushinga w'itegeko rishyiraho umusoro ku musaruro, ni umushinga w'itegeko abadepite bibajijeho ibibazo binyuranye birimo kumenya uburyo ibikorwa bimwe na bimwe by'ubucuruzi bizajya bisoreshwa nta kunyereza imisoro kubayeho.

Ubwo yagezaga ku nteko ishinga amategeko umutwe 'abadepite, ishingiro ry'umushinga wo guhindura itegeko no.016/2018 ryo ku wa 13/04/2018, Umunyamabanga wa Leta muri Minisiteri y'imari n'igenamigamba, Richard Tusabe yavuze ko byagaragaye ko hakenewe kuvugurura itegeko ririho. 

Yagize ati ''Byagaragaye ko hakenewe kuvugurura itegeko ririho kugira ngo rihuzwe n'umushinga wa Kigali International Busines Center. Byagaragaye ko hakenewe gusobanura neza niba umusoreshwa w'imikino y'amahirwe niba agomba kumenyekanisha umusaruro ukomoka ku mikino y'amahirwe. Bikaba byaranagaragaye ko hakenewe kuvugururwa inyungu y'umwaka isoreshwa n'umusaruro w'ukwezi usoreshwa mu rwego rwo kugabanya uburemere bw'umusoro ucibwa abakozi bafite umushahara muto no guteza umurimo muri rusange.''

Zimwe mu mpinduka z’ingenzi zikubiye muri uyu mushinga w’itegeko, zigamije koroshya umutwaro ujyana no kuzuza inshingano z’usora.

Indi mpinduka ikaba iy'uko umusaruro ukomoka kuri serivisi zitanzwe mu buryo bw’ikoranabuhanga n’izitanzwe n’ibitangazamakuru bikorera kuri internet, wongerewe mu mushinga w’itegeko nk’inkomoko nshya y’umusaruro usoreshwa.

Abadepite bitabiriye iyi nteko rusange babajije uburyo ibikorwa by'amadini n'amatorero bizasoreshwa cyane ko byakira imisanzu y'abaturage, ndetse n'uburyo uburyo buzakoreshwa mu gusoresha ibitangazamakuru bikorera kuri murandasi:

Depite Ndoriyobijya Emmanuel yagize ati ''Ndashaka kubaza impamvu nyamukuru ituma ibikorwa by'amadini n'amatorero bitatanga umusoro cyane ko usanga muri iyi minsi bakusanya amafaranga y'abaturage bakayashyira mu bikorwa bibyara inyungu. Ni iyihe mpamvu bitagaragara muri iri tegeko?''

Depite Bizimana Deogratias ati ''Ibitangazamakuru bikorera kuri murandasi ntabwo bitanga inyemezabwishyu, kandi wenda buri kwezi hari amafaranga menshi bahabwa, njya numva bivugwa ku youtube ibaha amafaranga, bazabwirwa n'iki ko umusaruro bagaragaje ari wo?''

Umunyamabanga wa Leta muri Minisiteri y'imari n'igenamigamba Richard Tusabe yavuze ko hatekerejwe uburyo bwo kugenzura abafite ibikorwa bitanga umusaruro:

Tusabe Richard yagize ati ''Amadini afite ibikorwa bijyana no kwigisha ijambo ry'Imana ibyo ntabwo bisora, ariko ibikorwa by'idini cyangwa itorero bibyara inyungu birasora. Niba itorero cyangwa idini rifite ihoteli cyangwa resitora irasora. Dufatanyije na RRA ndetse na RURA,dufite systeme igenzura ibitangazamakuru bikorera kuri murandasi, ku buryo nta kizaducika mu misoreshereze.''

Ishingiro ry'iyu mushinga w'itegeko ryemejwe, ariko rikazoherezwa muri komisiyo ibishinzwe kugira ngo ribanze kunononsorwa rizabone kugaruka mu nteko rusange kwemezwa binyuze mu matora.

John Bicamumpaka



Ba uwambere gutanga igitekerezo

Tanga igitekerezo:



RSS FEED

Urubyiruko ruri muri FPR Inkotanyi rwasabwe kwiga umuco nyarwanda no kurangwa n&

Itsinda ry'Abayobozi bakuru 25 ryaturutse muri Sudani y'Epfo ryasuye i

Ahahoze inkambi y’impunzi ya Gihembe hatangiye gusubiranwa mu rwego rwo ku

Abagenerwabikorwa ba Imbuto Foundation barashimira ibyo umaze kubagezaho mu myak

Humviswe Abofisiye bakuru ba Gendarmerie bakoze amaperereza kuri Muhayimana

Uganda yirukanye Abanyarwanda 30