Abadepite ba EALA barashima u Rwanda kuba rwarahuje amategeko n’ibiteganywa na EAC

Inteko ishinga amategeko y'Umuryango wa Afrika y'Iburasirazuba, EALA, irashima Leta y'u Rwanda kubera umuhate warwo mu kubahiriza ibiteganywa kugira ngo kwishyira hamwe ku ibihugu binyamuryango bigerweho.

Ibi bitangajwe mu gihe hari bimwe mu bihugu binyamuryango bitungwa agatoki kuba nyirabayazana w'idindira rya gahunda zinyuranye zigamije koroshya ubuhahirane, urujya n'uruza rw'abantu n'ibicuruzwa n'andi masezerano yose agamije gutuma kwishyira hamwe muri uyu muryango bigerwaho.

Ni mu gihe kandi abadepite bo muri EALA, bari mu ruzinduko mu bihugu binyamuryango mu rwego rwo gusuzuma aho bigeze bivugurura amategeko yabyo kugira ngo ahuzwe n'ay'uyu muryango nkuko biteganywa n'amasezerano awushyiraho.

Perezida wa Komisiyo ishinzwe amategeko muri EALA,  Amb. Fatuma Ndangiza, avuga ko basanze u Rwanda ruri ku isonga mu guhuza amategeko yarwo n'ay'uyu muryango. 

Kwihutisha no kunoza imikorere n'imikoranire hagati y'ibihugu binyamuryango kandi, ni bimwe mu byo Amb. Fatuma Ndangiza avuga ko bikidindiza inzira yo kuvugurura no kunononsora amategeko ku rwego rw'umuryango wa Afrika y'Iburasirazuba.

Itsinda ry'abadepite 6 ba EALA rikaba ari ryo riri mu ruzinduko mu Rwanda mu rwego rwo gusuzuma aho rugeze ruhuza amategeko y'igihugu n'ay'uyu muryango wa Afrika y'Iburasirazuba. Isuzuma nk'iri mu bihugu bigize uyu muryango rikaba ryaherukaga gukorwa mu mwaka wa 2016.