AMAFOTO: Minisitiri w’Ingabo wa Zimbabwe yatangiye uruzinduko mu Rwanda

Kuri uyu wa Mbere, Minisitiri w’ingabo wa Zimbabwe, Muchinguri Kashiri yatangiye uruzinduko rw’akazi mu Rwanda rukazama iminsi ibiri.

Akigera mu Rwanda, yagiranye ibiganiro na mugenzi we Maj. Gen. Albert Murasira wamwakiriye ku cyicaro gikuru cy’ingabo z’u Rwanda ku Kimihurura.

Ibiganiro byabo byibanze ku bufatanye n’ubutwererane mu by’ingabo n’umutekano, hagati y’u Rwanda na Zimbabwe.

Minisitiri w’ingabo wa Zimbabwe, yatangaje ko ari mu Rwanda ku butumire bwa mugenzi we w’u Rwanda, kugira ngo barebere hamwe uko bashimangira ubufatanye hagati y’ibihugu byombi.

Yavuze ko icyo bahereyeho uyu munsi ari uguhana amakuru ku mbogamizi impande zombi zihura nazo, muri izo ngorane harimo guhangana n’iterabwoba, haba mu bihugu imbere cyangwa mu turere biherereyemo ndetse no ku mugabane wa Afurika.

Yagaragaje ko umubano w’u Rwanda na Zimbabwe ari uwa kera, guhera mu 1997 ubwo hasinywaga amasezerano y’ubufatanye akiriho na n’ubu.