ABAFITE AKAZI BISHIMIRA KO KABAHESHA AGACIRO N’ISHEMA

Abakora imirimo inyuranye baravuga ko uretse kuba akazi bakora kabatunze, kababasha no gutanga umusanzu mu iterambere ry'igihugu, ariko kakanabahesha ishema mu bandi. 

Basaba leta gukomeza gushishikariza abaturage, cyane cyane urubyiruko, guha agaciro akazi kose kandi bakakitabira, kugira ngo nabo biteze imbere banateza imbere igihugu.

Kuri iyi tariki hizihizwaho umunsi w'umurimo, abakora imiromo itandukanye yinjiza amafranga bishimira ko ibatunze bo n'imiryango yabo kandi ikanatuma bagira uruhare mu kubaka igihugu.

Abarangije kubona icyo bakora, bemeza ko nta kazi gasuzuguritse kabaho, bagasaba Leta kongera ingufu mu gukangurira urubyiruko kwitabira umurimo. Uretse ibi kandi, abafite imirimo bakora umunsi ku wundi, bemeza ko uretse inyungu y'amafaranga akazi kabinjiriza, binabahesha agaciro n'ishema mu bandi, ngo kuko iyo udakora n'ibitekerezo ntibitera imbere.

Abafite imirimo inyuranye kandi, bishimira ko hariho umunsi wahariwe umurimo, kuko ari umwanya wo gusubiza amaso inyuma, bakareba aho bavuye n’ibyo wagezeho. Ngo ni n’umwanya wo gufata ingamba ku bitaragenze neza, mu rwego rwo kurushaho kwiteza imbere.