5000 by'abaturage muri Ndera na Rusororo bagiye kubona amazi meza

GUTAHA IBIKORWA BY' AMAZI GASABO  JTK LE 5/4/2016.

Mu mirenge ya Ndera na Rusororo ho mu Karere ka Gasabo hatashywe imiyoboro y'amazi  izafasha abaturage bagera ku bihumbi 5000 kubona amazi meza.

Iki gikorwa kigezweho ku bufatanye bw' ikigo cy' igihugu gishinzwe amazi n' isukura WASAC, Akarere ka Gasabo n' umuryango wigenga Word vision abaturage bahawe amazi bavuga ko bashimira Leta y' u Rwanda ihora ibatekereza cyane, ibyo bayisabye ikabibaha.

Abayobozi mu nzego zinyuranye bari barangajwe imbere n' umunyamabanga wa Leta muri Ministeri y' ibikorwaremezo Kamayirese Germaine nibo bafunguye ku mugaragaro ibikorwaremezo birimo ikigega ndetse n' amavomo yubatswe kugirango abaturage bo mu mirenge ya Ndera na Rusororo  batabonaga amazi abashe kubageraho.

 Mu murenge wa Ndera by' umwihariko mu tugali twa Cyaruzinge na Rudashya imiyoboro y'amazi ifite uburebure bwa Kilometero 16.6 yatangiye kubakwa muri 2013 yuzura itwaye miliyoni zigera kuri 600 z' amafaranga y'u Rwanda, abaturage bagera ku 2000 akaba aribo bagenewe aya mazi.Mu tugali 3 tw' umurenge wa Rusororo ho ku bufatanye bw' ikigo gishinzwe amazi n' isukura na Wordvision hubatwe amavomo  y' abaturage afite uburebure bwa Km 16 azafasha abaturage bagera ku bihumbi3 kubona amazi ,naho imirimo yo kuyubaka yatwaye miliyoni 288 z' amafaranga y' u Rwanda.

 Abaturage bavuga ko ibikorwa remezo by' amazi byabegerejwe bije kubaruhura imvune bagiraga bajya gushakisha amazi kure yabo.

Umunyamabanga wa Leta muri Ministeri y' ibikorwaremezo Kamayirese Germaine yavuze ko intego ya Leta y' u Rwanda ari uko 100% by' abanyarwanda bagerwaho n' amazi meza kandi mu gihe gito gishoboka. Mu mujyi wa Kigali abayafite bakana bageze ku kigero cya 87%.